【專欄】見「曱甴」或「狗」即鎖

年多前，開始玩社交平台。「老友Z」問：「碌Sir，你有不少電台及專欄粉絲，為乜唔開個『粉絲頁』（Fanpage），凝聚更多支持者呢？」

「哎呀，咁好似太公開喎。我周不時見到啲乜乜物物網上的留言，十之七八粗口爛舌怒氣沖天。尤其涉及政治的，那班不同顏色人恍似遇上殺父仇人，睇完壞情緒又損健康。」我興趣不大，又唔識搞。

「唔係㗎！你可以控制㗎。一般網，當然希望愈多人睇愈好，故來者不拒，品流複雜。你唔同，可以選擇粉絲㗎！你屬『樓主』，可定『園地條例』（『House Rule』），唔遵守，一律鎖戶冇得入。咁啦，我幫你搞啦。不求量，只求質，慢慢累積同價值觀的粉絲，總之，內容吸引，就會出現『有機生長』（『Organic Growth』），以你能量，好快上萬！」

「哈，唔使我做又唔拘噃！咁，我旗幟鮮明定規矩先：一、唔接受粗言穢語；二、唔接受政治及宗教狂熱分子；三、唔接受不懂論理者（可以有意見，但不能冇根據亂罵一通）；四、唔接受『五毛』。」
粉絲頁二○一八年十一月開始。當時，未有波濤洶湧的政治運動，也未有新型肺炎，北京亦未「高度關注」香港政情。
風平浪靜日子，摸索粉絲喜歡睇乜，進展比較慢，半年運作只吸到不夠四千粉絲。

但是，去年六月開始，風起雲湧，小弟當然不停發時局評論Post，一觸及敏感議題，立即被大量轉發。Like相當多，留言鬧爆也不少，尤其涉及警隊的評論，正常。

到今年，我大概已掌握粉絲的關注，凡出Post，皆有萬計，甚至超過十萬接觸者。

當中有千計直接反應。尤其出席完《毓民踩場》，粉絲升幅更快，已邁向三萬七千。

今日執筆，不得不向新粉絲再提House Rule，並聲明：不准用「狗」及「曱甴」來形容紀律部隊及抗爭者，太侮辱，一講即鎖戶！（曾智華）

全文刊於《星島日報》「阿碌開咪」專欄