【專欄】一雷天下響

N年前，「香港鐘表大王」孫秉樞，取得一隻瑞士名表Rado代理權之後，苦思如何推廣，全面打入香港市場。

結果，出咗兩招，令此表立即名震香港。首先，譯咗個冇得輸的名——雷達表。意指非常精準，像是軍方用的頂級科技，將表的形象鮮明地勾劃出。

第二招，更顯出老孫不僅是企業家，更屬創作天才。因為竟能夠度出兩句家喻戶曉、由小孩到長者皆琅琅上口的廣告口號——一雷天下響，發達無限量！完全食正「雷」及「達」兩個字。更將香港人的「發達夢」注入，立即成功打入市場，大賣特賣。

今天諗起這兩句口號，因見到過去一星期，香港爆出咗個紅到發紫的人物——區域法官郭偉健。點解？全港市民都知，不贅。

我肥碌對此君極好奇，於是走訪香港法律界資深老友，起起郭官的底。香港法律界，尤其法官與大律師的圈子，其實非常細。邊個邊個性格如何？打過/審過乜大中小具新聞性的案件？點判......全部都曾經「吱吱噚噚」在枱底八卦。

當然，企到上庭，就人人變回專業。

正正因咁，所以，突然有個官「不依章法」出牌，就會令業界起哄，結果，郭偉健立即「一雷天下響」矣。

資深法律界人士向小弟講：「唉，界內人人都知郭官脾性獨特，絕對忠於自己（並非別人看法）的原則及判斷，所以，簡中判詞咪未必人人啱聽囉！同情被告，當然有佢原因，但若真的為被告好，其實最實際方法，係表面省佢，然後輕輕量刑，等佢唔使坐咁耐咪得囉！可惜，郭官採取『清心直說』，結果咪變『一雷天下響』囉！」

呢單Case，將會繼續引起好多學術性及法理性的辯論。

小弟最認同大狀老友M君看法：「整件事，最不幸為法庭抽起郭官，唔畀佢審理一宗本來由佢審的案件，令人覺得法庭屈服於輿論壓力之下！其實可以有N種更有智慧的方法，去處理『郭官問題』的呀！」（曾智華）


全文刊於《星島日報》「阿碌開咪」