【維港會】不滿客人嫌菜貴 檔主揮舞鎅刀爆粗狂罵孕婦

到街市買餸時經常要到處格價。日前一對夫妻到上水街市買餸時，丈夫因為覺得菜檔的菜太貴而不禁驚呼出來。不料菜檔檔主竟怒氣沖沖手持鎅刀奔向夫妻2人，不斷以粗口辱罵他們，更在懷孕的婦人面前揮動鎅刀，令2人受驚。有街坊指該檔是出名的惡霸，早已臭名遠播。

一名女網民日前在FB群組「北區之友 Friends of North District (上水、粉嶺、沙頭角和打鼓嶺)」發文指，自己與丈夫到上水石湖墟街巿打算買豆苗，當時2人在街市內不停格價，直到行到較後的菜檔時，發現該檔的豆苗並沒有標示價錢，女網民於是上前問價，店員回答指60元半斤，而丈夫因少到街市買餸，不知道豆苗一向昂貴，驚呼「嘩！黐線啲菜咁貴嘅，唔食豆苗啦」。

想不到菜檔檔主聽到後大怒，隨即手持鎅刀衝出來指罵他們，「黐乜嘢線，呢啲係豆胚」，女網民隨即解釋指丈夫只是不了解菜價，一時驚訝之下才脫口而出，並非有心罵人。但檔主毫不領情，繼續以粗言穢語辱罵他們，又不斷揮動手上的鎅刀，更出言恐嚇他們，「我好聲好氣行上前解釋：我老公好少去街市唔知豆苗呢啲係咁貴，佢嗰句野唔係鬧你地，純粹係表達下食菜唔知買菜貴咁啫。點知個檔口阿叔完全唔收聲，不停係到問侯我地老母，仲係到大聲撻朵話自己叫『家棋』，不停叫我地有本事就搵人掃佢檔口，鬧嗰陣仲係咁舞佢手上把鎅刀」

女網民因懷有身孕，擔心檔主會傷及嬰兒，所以打算離開。「我陀住BB怕危險，本來都轉咗身走㗎啦，點知個阿叔又喺到不停X，話我地怕咗佢要走。我老公嬲到行返轉頭，我就同阿叔講，都講左句嘢唔係鬧你。我地都轉咗身走，你乜事要咁樣呢，一啲道理同禮貌都無。阿叔就指住我肚鬧我係狗乸，仲要揸住鎅刀係我肚面前舞嚟舞去。我老公就拎左隻蕃茄丟佢，佢揸住刀又再行近我，我老公就執起左板車仔諗住同佢死過，最後冇打到」

女網民事後忿忿不平，呼籲街坊不要光顧該檔。有網民看到後都批評檔主過份，「鬧人狗乸咁無口德」、「買棵菜都唔使俾佢問老母」，亦有街坊指該檔一早臭名遠播，「佢係石湖墟街市紅人」、「點解呢檔野仲生存到，幾時先肯執笠」、「依檔嘢成日鬧人㗎，鬧到好似殺咗佢全家咁」。