歐陽震華重提7年前酒後險死：醫生話我天濛光嗰陣走咗㗎啦

歐陽震華（Bobby）在昨（20日）晚播出的《諸朋好友》節目中，被主持崔建邦大膽問到於2013年疑飲酒過量險死一事，Bobby亦大方首談，否認飲得太多中酒精毒。他承認當晚的確有飲過，但只是小酌，並說：「嗰排我拍緊《情逆三世緣》比較攰，我記得嗰晚年初二嚟，咁年初一瞓咗一晚，年初二仲唔猛鬼出籠？首先開餐啦，我記得嗰晚食我鍾意嘅麻辣火鍋，嗰兩個鐘頭係不斷咁擺嘢落口，飽都要食呀！因為初四開工，又唔知幾時先再有得食！」

Bobby謂在朋友家，其他朋友未到，酒又斟了，於是飲了少許，因為累去小睡一會，待人齊再叫醒他。他說：「可能下意識吞咗一啖入肺度，呢啲係肺炎嘅造成。（落咗氣管？）係啦！咁就塞咗個肺囉！咁都唔知㗎！後尾再叫我呢，屋企人先見到我塊面都紫埋啦！可能再遲啲呢，就硬咗㗎啦，唔係凈係青晒，咁送我去醫院。」

Bobby自言在急救過程仍有少許意識，如抽他過床、睇他瞳孔，他知道但否知發生何事，並謂看到自己靈魂出竅，「後尾醫生同我講話返：『你天濛光嗰陣時走咗㗎啦，但你8、9點又返番嚟。』驚唔驚？」死過翻生的Bobby現在說著哈哈大笑，但把一同跟他做嘉賓的宣萱嚇呆了，問：「吓，你講真呀？」Bobby說：「係呀，佢哋唔係睇我個樣，係睇數據。」當時血壓指數一直跌，之後回升他又回來了，醫生說可能他做演員捱得眼瞓，一叫埋位就即醒，能力比普通人強。醫生告知他清醒一刻眼即瞪大，他說再瞇眼不知會否再睡，所以不敢眨眼！說畢後Bobby笑問已嚇到眼定定的宣萱：「驚唔驚？唔使驚，Bobby喺大廳！」最後Bobby謂事件令他會嘗試好多以前沒做過的事，學懂無常珍惜當下，始終人只得一條命！
在這之前，Bobby另一大事是憑《賭場風雲》成為首位入圍艾美獎最佳男主角獎項提名的香港演員，但卻受不起，壓力大到生蛇，上機到當地出席頒獎禮一刻，面部開始痛到似被千支針拮，面和鼻腫脹，連行紅地氈訪問都不做。