【獨家】睇好嘉欣攞視后賴慰玲拎女配黎耀祥期待四奪視帝

2021-01-08 00:15

拍劇34年嘅黎耀祥眼光獨到，去年喺台慶頒獎禮前夕接受《頭條日報》訪問時，貼中晒視帝馬國明及視后惠英紅，今年他憑《殺手》「閻武」再角逐視帝，問到第四次封帝成數時？祥仔笑說只有五五波，同《踩過界II》王浩信有得揮！取決係評審同觀眾口味，他拉票說：「我賣點係除衫同埋拍打戲，畀到小小驚喜觀眾囉！」採訪：方騫平攝影：張詠森

黎耀祥同TVB只係合約演員關係，但落力程度同「親生仔」冇分別，最近為拍新劇《拳王》一場打擂台戲操到8塊腹肌，身形較《殺手》的鋼條身形更Fit。日前祥仔跟朱敏瀚及賴慰玲拍一場街景戲，原來賴慰玲好怕祥仔，形容成個行頭最驚係佢，感覺佢眼神可以睇穿一個人，賴慰玲笑說：「以前望住佢拍《財神駕到》驚到震，𠵱家叫做招架得住，不過，喺佢身上學會不斷求進步。」

貼徐榮奪男配
黎耀祥就話睇好賴慰玲憑《反黑路人甲》攞到女配，賴慰玲嚇到口震震回應：「有前輩賞識，真係好過攞獎，獎項呢啲預計唔到，平常心。」至於56歲祥哥咁落力拍《殺手》及《拳王》，TVB係咪要畀返個獎嚟鼓勵吓？他笑說：「咁又唔使，有咁好劇作，自己都有滿足感嘅，當然都恨有獎，因為獎項係個鼓勵。事實上我同龔嘉欣喺《殺手》都幾突出，嘉欣都好大機會勇奪視后，因為公司入面，唔係有太多女藝人咁搏同埋咁打得。至於王浩信盲俠個角色幾得意，而觀眾會睇埋佢整體拍劇嘅表現，佢喺《反黑路人甲》都唔錯。至於男配以徐榮《反黑路人甲》睇高一線，他演得比朱敏瀚放。」