開網上音樂會憶往事爆喊　Mischa答應粉絲同顧定軒再合作

網上音樂會中，Mischa與Zeno為歌迷演唱多首歌曲，包括《毛球》、《神把眼淚都留給了人》、《浸浴》等。兩人均表示為首次合唱live感到很開心，Zeno坦言心情緊張，閒談時也變得「口窒窒」，場面搞笑。Mischa表示原本仍可與Zeno開玩笑，但看了Zeno的演出後，情緒突然被觸動，她說：「想藉住呢個機會唱一啲我以前寫嘅作品，嗰時可能冇乜人聽到，好希望大家可以聽到我哋嘅作品。」其後Mischa失控落淚，粉絲們不斷留言為她打氣。

音樂會尾段，Mischa唱出新歌《浸浴》後，再邀請Zeno登場，此時Mischa再眼泛淚光說：「好想將首歌送畀所有人，所有想喺人生裏面重新嚟過、將一啲嘢放低，或者去面對最真實嘅自己、接受嗰個自己嘅人，就好似我哋要擁抱番自己，重新開始過。」提到Mischa在騷內多次落淚，她笑言：「唔知點解，可能觸動到條神經，一望住Zeno就想喊。」Zeno表示自己本身也沒有打算喊，但看到Mischa喊得很厲害，自己也有被感動到，他補充：「唱嘅時候都好感動，但係其實我哋互望，尤其唱《遇見》嘅時候，諗番起好多《造星III》嘅時光，亦都因為個節目，令到我哋認識，所以多謝Mischa可以share呢個舞台畀我，然後我好似可以完成更多音樂上嘅嘗試畀大家。」



Mischa對Zeno前來擔任嘉賓感到很開心，坦言之前一直沒有機會與Zeno好好合唱，更希望將來可以再合作，翻唱多首歌曲。Zeno就形容這次音樂會「有一種好圓滿嘅感覺」，更透露與Mischa在參加《造星III》時已提過合作錄翻唱歌。提到未來合作，兩人異口同聲表示有興趣合唱，更答應粉絲會多錄歌給大家聽，又叫粉絲提出想聽的曲目，令人期待。