【頭條獨家】做《諸朋好友》跟老友真情對話 41歲崔建邦放低枷鎖再起步

崔建邦(Amigo)去年被力邀回巢，第三度返入TVB，今次更有份策劃製作節目《諸朋好友》，更有機會同張秀文角逐《萬千星輝頒獎典禮2020》的「最佳節目主持」，最終輸咗畀周柏豪及袁偉豪主持的《兩個小生去Camping》。對被指回TVB係收復失地，他帶笑謙稱：「都未有個地，點算叫收復？不過，做到一個節目令觀眾睇得開心，係開心嘅。」採訪：方騫平

崔建邦曾經被捧為TVB金牌司儀，可惜2009年因襲擊當時女友鄺敏慧形象受損被無綫解約，2011年崔建邦自薦重返TVB並由助理編導做起，之後離巢發展，直至去年重返主持《諸朋好友》，跟嘉賓好友宣萱、歐陽震華、黃日華、苗僑偉、林國斌及方中信等真情對話，口碑唔錯。

從嘉賓身上學習
透過節目，Amigo坦言喺嘉賓身上學到嘢：「好似喺姜皓文身上，學會點去堅持，其實好難；華哥、三哥身上學會兄弟間嘅照顧，對另一半專一，係令我好嚮往；宣萱、歐陽震華間嘅默契令我好恨有個咁好嘅拍檔！希望之後都可以訪問到側田、張敬軒等。」Amigo透露有11年時間過得好驚濤駭浪，「由有事發生到做PA，直至返出嚟做主持，初期過唔到心理關口，好似帶罪之身，好多枷鎖，坦白係做得唔好，𠵱家做自己想做嘅節目，事業同感情叫啱啱起步，真真正正學識做主持同埋做一個男朋友。」問到有冇說話同舊愛講？他笑言，「咁又冇，其實我以前每一份感情都好認真，人生就係咁，尋尋覓覓嘛。」