【獨家】為火爆壞男孩形象平反　林師傑喊住多謝老婆完全信任

出身於09年《超級巨聲》的林師傑，去年中宣布跟TVB提早解約，盛傳受太太歐陽巧瑩政見所累而遭冷待，當時他公開寸舊公司給予「恩賜」，要求轉簽一年保證有1.2萬收入的6騷合約。目前，師傑以獨立歌手身份重新出發，談到歌曲《尊悲不分》，「好多人掛住好嬲嗰個林師傑，覺得第一步出嚟應該畀人Feel到我團火，但我最想人知道我有沉思，係飲水思源嘅人。」他為火爆形象大平反之餘，又感激一班前公司高層如何哲圖等的栽培。撰文：黎寶倫　攝影：張詠森　服裝：尺度Rule Crossing Man　場地：Kura Teppan + Sake Bar

回想加盟「星夢娛樂」的5年間，林師傑只能唱公司安排的歌而且反應一般，令他覺得前路茫茫，當要被迫轉約時決定離開，「最唔開心係畀人覺得我尖銳，我都冇得揀，憤世嗰個竟然係我？有唔舒服，但現實係咁殘酷。」提到早年傳向高層舉中指又一腳踏幾船，予人反叛形象的師傑即喊冤，自言對酒精敏感亦唔愛夜蒲，「一張蒲嘅相都冇俾人影過，何來極曳？每次寫歌我都係澄清一啲嘢，但發現樂迷未必Feel到我諗咩，因為自己嘅音樂都係迎合人哋，我想搣走呢樣嘢，平衡番自己。」

離巢後獲太太全力支持，令師傑更有動力打拼，「佢係我老婆、最好嘅朋友，亦係人生數一數二好欣賞、敬重嘅人，喺我未睇清自己嘅時候，佢已清楚睇到我會成為一個好爸爸，好感動，佢竟然會諗到咁長遠，我都冇諗到自己會結婚，令我對人生好有憧憬。」語畢他即哽咽，問自幼四處漂泊的他可覺泊到「好碼頭」？14年傳被舊愛鄧穎芝撞破跟𡃁模車震的師傑喊着續道：「佢畀到好大信心我，佢同我一齊嗰陣爆車震新聞，一張相都冇，佢都決定信我！」問到幾時生B？他稱努力中，但生活太多壓力，一切隨緣！