【李香琴大殮】 為喪禮任嘉賓致悼詞　汪明荃讚琴姐重情義獲愛戴

李香琴（琴姐）於本月4日因病離世，終年88歲，昨日在紅磡世界殯儀館設靈，並於今晨出殯，一眾好友紛紛到場送別她最後一程。在追思會中，跟琴姐相識多年的八和會館主席汪明荃（阿姐，Liza）獲邀發表悼詞，昨晚阿姐將悼詞上載至IG，分享她與琴姐的相處點滴，坦言在對方身上學到唔少嘢，大讚琴姐多才多藝、風趣幽默，更是重情義又照顧後輩的人，因此圈中朋友、學生、徒弟、契仔女滿天下！

全文如下：
「＜懷念琴姐＞
我認識琴姐都差唔多接近半個世紀。

同好多人一樣，最初對琴姐嘅印象，就係電影裡面嘅奸妃，係余麗珍「東宮」嘅對頭人「西宮」陰險惡毒，演得人型人格，睇到人咬牙切齒。而我同琴姐真正合作，就係我1971年加人TVB之後，但亦都由電影大銀幕跳人電視圈，我哋一齊做《歡樂今宵》。當年做《歡樂今宵》，無論主持、跳舞、雜技、現場賣廣告、琴姐通通都搞得掂；唱歌亦難唔到佢，粵曲、小調、中西流行曲、甚至日文歌，都可以即學即唱；要扮鬼扮馬咩？佢一樣冇問題！扮乜似乜不特止，但仲諗頭多多，佢個Locker經常收埋好多古靈精怪道具，隨時爆肚笑到大家停唔到；趣劇更加係佢嘅強項，同最佳拍檔炳哥演嘅《大鄉里》直頭係代表作，我當年同石修都有份一齊做，跟住兩位前輩學搞笑，真係每次都袋錢落我哋袋！

琴姐喺《歡樂今宵》，盡情發揮佢嘅多才多藝、風趣幽默、同埋超晒班嘅急才，所以令佢成功人屋，大受觀眾歡迎！

而我當時做咗幾年《歡樂今宵》之後，公司就安排我轉去劇組，琴姐亦都開始拍劇；記得我早期演嘅其中一部劇《永恆的春天》就係同琴姐合作；劇裏面我飾演一位盲妹，琴姐就係做我嘅媽媽，而且仲係一位無微不至、賢良淑德嘅賢妻良母，當時一知道呢個配搭，我覺得好新鮮，但係同時都有少少懷疑，雖然喺《歡樂今宵》，琴姐都有扮鬼扮馬，但係佢喺電影嘅「西宮」形象始終仲係好深刻，點知當時拍第一場戲，一埋位，琴姐以往奸妃嘅潑辣銳利眼神竟然可以完全冇晒，變為好慈祥同和藹和親，再加埋化妝同造型，真係同霸道嘅「西宮」180度轉變晒，相當厲害！之後劇集一出，佢嘅演出感動到好多觀眾，從此開拓咗佢奸妃以外嘅戲路，喺演出上「改邪歸正」，成功轉型！

除咗電視同電影演出，琴姐亦醉心粵劇演出。佢細細個因為鍾意睇任姐任劍輝，所以就入咗行，而佢亦同好多出名大老倌合作過，更被譽為係「二幫王」，好有名氣！當年《歡樂今宵》，波叔梁醒波同琴姐成日鼓勵我去做粵劇，而當時波叔亦係八和主席，有一次，佢邀請《歡樂今宵》同事，為華光誕演出《六國大封相》，我當年就負責跳羅傘架，但係當時我冇戲服，於是琴姐就私人借咗一套畀我，仲教埋我要點樣演、點樣做，佢的確係好照顧後輩；而琴姐亦做過八和副主席，後來八和開辦第一屆粵劇學院，佢亦都好關心學員發展，好似廖國森、莊婉仙、衛駿英等等，當時琴姐遇到有人請佢演神功戲，好多時都會同班主講，佢情願自己收少啲，都希望帶埋一班新人去表演，為佢哋爭取多啲踏台板嘅機會！至於我自己，1983年第一次做粵劇，同林家聲演出《天仙配》，我係正印，雖然琴姐已經係好有資歷嘅劇壇前輩，佢亦都願意幫手做「二幫花旦」，客串大姐嘅角色，喺綵排同演出期間，佢亦毫不吝嗇咁教我好多好多嘢，到今日，我都依然衷心感激佢。除咗提攜後輩，琴姐亦都好關心同行，佢知道戲行好多下欄演員、衣雜箱工人，人工少，又或者開工唔夠，生活好艱難，所以一有機會，佢就會搵個令大家聽得舒服嘅藉口，借啲意畀封利是佢哋，所以行內上上下下，都覺得琴姐絕對係一個重情義嘅人；而琴姐一生熱愛粵劇，佢亦同佢女兒紫筠講，好感激華光師傅畀佢人行，所以紫筠都同我講，希望代表媽媽，將啲帛金捐畀八和會館，回饋粵劇界，喺度我都代表八和，多謝紫筠同琴姐。

琴姐之所以德高望重，唔單止因為但跨越半世紀嘅演藝成就，而且仲係因為佢喺演藝界，樹立咗一個典範：佢工作態度認真、勤力、守時不在話下，對任何人亦冇分高低，無論有錢冇錢、資歷深定淺，佢都一樣尊重你、一樣對你真誠友善，仲有，即使呢一行人事關係好複雜，我亦從未聽佢講過半句是非，或者喺背後講任何閒話，所以佢人緣相當好，朋友、學生、徒弟、契仔、契女滿天下！

記得我最後一次見琴姐，係幾年前大概佢生日左右，我同關菊瑛一齊去探佢，當時佢已經病咗一段時間，當日一入門口，佢就嗌我“Liza Liza”，嗰日佢精神好好，好有笑容，我哋仲同佢一齊唱咗幾首歌：《分飛燕》、《香夭》，雖然佢咬字未必好清晰或者唔係好記得歌詞，但係我哋一唱，佢都會接得到，我好感受到佢對粵劇仍然念念不忘，不過坦白講，當日嘅相聚，其實我真係唔太肯定佢仲記唔記得我，但係我，一定唔會忘記，喺我嘅演藝路上，曾經同一位咁值得我學習同尊重嘅前輩共事過，能夠同妳認識同合作，係我嘅榮幸。

琴姐，一路好走，晚輩永遠懷念。」