【8個月冇見】洪天明瞞住囝囝返屋企大仔TJ難以置信爆喊攬住老竇

2021-02-03 17:10

因為疫情影響出入境要隔離，所以好多離港工作嘅藝人都好耐冇返香港，例如洪天明，已經有8個月冇返屋企。不過下周就過年嘞，係時候要返香港。

為咗畀兩個囝囝一個大驚喜，洪天明趁老婆周家蔚帶兩個仔去街後先返歸，安頓好再等囝囝。「八個月不見了，終於能回家啦。孩子在不知道的情況下會有什麼反應⋯⋯希望大家能多陪家人。疫情快點離去。」

洪太抱住5歲細仔JT(洪竟琋)先入屋，8歲大仔TJ(洪大仁)隨後，佢一見到洪天明都嚇親，呆咗數秒先識畀反應叫Daddy，天明張開雙手打算迎接囝囝，但TJ只識問「真係嘅?」天明邊除口罩邊答，「當然係真。」然後TJ即衝前攬實爸爸爆喊，洪太再抱細仔行近，JT再趨前攬實爸爸，三父子攬埋一齊，周家蔚被眼前景象感染都扁晒嘴有啲想喊。