【獨家】方便聾啞人士推透明I-SEE口罩　家燕姐祥仔美儀浚霆讚好無障礙溝通

新冠肺炎疫情持續1年多，市民已習慣長期戴口罩防疫，但聾人及弱聽人士就相當不便，因為他們要透過讀唇、手和表情用來溝通，有見及此，慈善團體福幼基金會去年便研發出「防霧透明窗醫用口罩（取名為「I-SEE口罩」）」。身為執行董事會董事的阮兆祥（祥仔）日前偕薛家燕（家燕姐）、江美儀和陳浚霆，戴上I-SEE口罩體驗無障礙溝通，家燕姐不忘搞笑自誇嘴靚笑容又靚，搞到祥仔都忍唔住哄前索吻；而美儀就爆陳浚霆怪癖，疫情期間鍾意睇人「離罩」！採訪：譚壹致、袁東亮　場地：六公館

為抗疫戴足一年口罩，自稱「靠把口及樣搵食」的家燕姐，笑言一向嫩滑的肌膚都因為戴口罩焗到生暗瘡；同為電台DJ的阮兆祥表示開咪時，因聲音被口罩「隔住」令效果朦朧，他說：「有時10個人坐長枱開會，大家遮住口都唔知邊個講嘢，正常人溝通都有困難，更何況聾啞人士呢？ 有時佢哋要靠手語配合口形先可以準確地表達意思，所以疫情期間好多聾啞人士喺溝通方面遇到困難。」

因此，祥仔透露去年福幼基金會研發了I-SEE口罩，方便聾啞人士同人溝通。訪問當日，戴上該款口罩的家燕姐笑道：「好欣賞各位為呢個社會、香港人做友善嘅嘢，呢個口罩真係好有用，你哋睇唔睇到我個嘴？（祥仔：睇到，好Sexy，忍唔住想咀落去。）我個嘴係靚，但淨係睇我個嘴，因為唔係大眾都學過手語，好似蕭芳芳本身有弱聽，同我哋溝通係睇口形，所以戴咗呢個口罩就方便好多。」

習慣睇人口形的江美儀直言戴罩後經常聽錯嘢，又不肯定別人是否跟自己說話，這段期間惟有靠估，陳浚霆笑謂：「所以我會等幾秒先畀反應人，變相學識做個好好嘅聆聽者。（美儀：即係我平時唔聽你講嘢？）唔係，舉例啫！」深明聽障人士的苦況，美儀也慶幸本港終推出I-SEE口罩，她說：「除咗聽障人士外，我哋都可以用嚟同佢哋溝通，加上好耐都冇見到大家笑，戴呢個口罩就可以見多啲笑容，多啲正能量。」陳浚霆就大讚可調節耳帶長度設計，「見啲人唔識揀口罩，發生離晒罩嘅現象。（美儀：你唔係鍾意睇人離罩咩？）呢啲嘢唔好喺度講，但呢款口罩無論好似你塊面咁Camera face，或我咁大塊面都Fit到，好貼、好舒服！」