【獨家】DisCover首為劇集唱主題曲 黃進林恨拍古裝扮刺客
2021-02-08 23:00 
樂隊DisCover近日為香港開電視外購劇《東宮》唱作香港版主題曲《錯過你》，談到今次歌曲大玩中國風，作曲的德哥（郭俊德）專程到錄音室「監工」，他笑言自己有強迫症，尤其著重歌詞的節奏， 於是乎在德哥與監製Patrick精益求精下，最後一句歌詞黃進林（Michael）唱足40次才收貨！採訪：黎寶倫
首唱中國風歌曲的黃進林直言今次唱法較難，德哥也表示：「我寫嘅Melody都唔易唱，高低音嘅Range好闊，但Michael可以做到，仲要揣摩感情、風格，其實係好高難度，所以我畀佢9分！」雖然NG數十次，但Michael指並非錄最多的一次，「舒文監製嘅第一首派台歌《分開紀念日》錄得仲多，佢訓練咗我意志力、耐性，令我知道錯乜位，之後同其他監製合作先順暢啲，今次都輕鬆啲。」
鍾意黎姿
鍾意煲日劇的德哥稱一直好期待寫一首劇集主題曲，Michael也很榮幸有份為《東宮》獻唱，更坦言恨拍古裝劇，亦不介意剃光頭，他說：「好型！因為現實世界冇可能着呢啲衫岀街。（想做皇帝？）我想做刺客喎，因為我鍾意跳嚟跳去，打鬥都有興趣，如果有機會參與，我可以去學。（但做刺客會遮靚仔樣喎！）通常錫女主角就揭開，好似蜘蛛俠咁。（德哥：諗多咗喇，你一出嚟就死㗎喇！同年紀大少少嘅女演員拍咀戲呢？）哈哈，唔介意，但我鍾意黎姿（現名黎珈而），做『細細粒』時我已經愛上佢。」
最新回應