【偷食沙律風波】認感情處理唔妥當 保錡事隔一個月終致歉兼停工
2021-02-24 15:00 
ERROR成員保錡早前疑似無縫接軌，與前女友賴嘉賢（Carrie）未正式分手便撻著新歡沙律（張沛樂），早前跟沙律開Live時又不斷以粗口辱罵網民，形象插水的他更被網民洗版式在ViuTV社交平台留言要求「走保錡」！
事隔接近一個月，保錡昨晚終在社交網撰長文向Fans道歉：「ERROR出首歌嘅MV又好、節目又好，就算肥仔、Dee哥、193做訪問，記者朋友同大家都會追問關於我嘅野（嘢）。我覺得我影響咗好多人，尤其ERROR同一直鍾意我哋嘅人。反思咗好多晚，雖然我講咗好多次會重新出發，但覺得依然欠大家一個交代。我意識到一方面我之前處理感情嘅事做得唔好，另一方面，當晚直播嘅言行舉止係好唔啱，說話亦無尊重過人。呢啲全部都係我嘅過失，我要面對自己嘅錯，出嚟同大家再次道歉。」
他又表示：「我已經同公司講，喺完成手頭上已開始嘅工作之後，所有工作將會暫停。我亦唔會參與任何節目及ERROR歌曲嘅宣傳。作為ERROR嘅一份子，覺得自己連累咗三位兄弟，破壞咗ERROR嘅形象，好對唔住。而家回憶返過去同三位兄弟一齊做嘢真係好珍貴，嚟緊ERROR嘅團歌，希望大家繼續支持佢哋。我知道保錡係大家眼中係一個毫無分寸嘅人，但希望下次大家再見到我嘅時候，會見到一個懂得尊重、願意承擔責任嘅人。我希望用行動證明。」
此Po一岀，不少網民都猜測保錡是否打算退團，有粉絲更擔心ERROR就此解散。不過自爆粗事件後，一直潛水零回應的經理人花姐（黃慧君）就開腔回應：「尊重保錡決定，畀啲時間佢沉澱，知道佢今次好內疚，覺得佢上了人生一課，我有信心保錡再見大家的時候會變得更好更成熟，期待再見到ERROR 4子嘅畫面。」
最新回應