【獨家】去年胃炎服藥後周身唔妥唐奕聰被病魔困擾足半個月

2021-03-02 20:51

去年聖誕前夕Gary曾入院做過胃鏡，被驗出有少少胃炎。可能食錯胃藥，side effect搞咗半個月，好唔舒服。

太極樂隊成員唐奕聰（Gary Tong）今日疑因心臟病發在住所猝逝，終年57歲。其實去年底Gary跟本報記者說過健康有啲唔妥:「聖誕前諗住乖啲，check吓身體照吓胃鏡，好彩都好健康，但醫生話個胃少少發炎。跟住唔知咩事，可能食錯胃藥，對自己有啲side effect，搞咗半個月，好唔舒服。」自此他更加注意健康，日日去跑步及游水，更不煙不酒。

Gary是著名音樂人，由作曲、編曲、監製唱片、音樂會音樂總監樣樣皆能，與已故一代巨星「哥哥」張國榮合作無間，曾任張國榮巡唱音樂總監。同時跟多位紅歌星，包括已故嘅梅艷芳、陳百強及譚詠驎、林子祥、黎明、郭富城、張智霖、王菲、張學友、陳奕迅、容祖兒等都合作過。

去年Gary有份參與張國榮改編專輯《REVISIT》，為他的經典名作重新編曲，其中《春夏秋冬A Balloon's Journey》是在「哥哥」64歲冥壽時推出，並用上從未曝光的錄音聲帶。對於能參與哥哥遺作，Gary接受本報訪問時曾表示係重聚，懷緬，回憶，感動，一秒都沒流逝！真的很高興參與這專輯，感恩。

另外，太極主音雷有輝（Patrick）表示突然，更說Gary係個樂觀嘅人，應該唔會想大家太傷心。