【UA結業】籲政府全面開放戲院救亡 田啟文狂呻:「點會迫得過地鐵?」

新型冠狀肺炎肆虐全球，香港各行各業大受影響，因應政府推出限聚令抗疫，本地戲院亦大受衝擊，由去年12月2日開始停業，今年2月18日（年初七）重開，當中錯過聖誕節、新年、農曆年等黃金檔期。由1985年成立的UA Cinemas（娛藝院線）陪伴了香港人36年，今日宣佈全線結業，並已啟動清盤程序，遣散逾百員工。身為香港電影工作者總會會長的田啟文（田雞）對於UA院線結業，表示感到震驚，擔心會有骨牌效應。

問到可有建議給政府幫助業界？田雞直言應全面開放戲院，過往未有出現睇戲染疫群組，惟獨有一單有人染疫後曾入戲院睇戲，但沒有因而傳染到其他人。他說「戲院由初七開到依家，只畀百份之五十入座，戲院好配合完全不准飲食，睇戲又點會除口罩？隔離坐位最多是自己朋友傾計，係咪應該放寬返？因為戲院的經營成本太重，再無正面訊息畀到行業有信心，戲院恢復返，這些都是正面訊息。當然依家政府就係唔想有這些訊息，大家唔好出街，咪得出呢個結論，龍頭院線都頂唔住，你話我點能夠不震驚同擔憂其他效應咩！」田雞再強調，「如果我係投資者想接手都唔敢啦！有人想做白武士都觀望吓先，點知轉頭想頂手，政府話想清零唔好做？其實話迫，點會迫得過地鐵，又唔停咗佢？戲院坐得舒服又無交雜，如果戲院曾經有案例，咁都心甘命抵。茶樓有事都係有事封邊度，尚且畀人哋求生，點解要趕絕戲院、做戲啲人先？」田雞再重申自己唔係黑心，但覺得其他院線未必全線結業，不過逐間執其中一條院線，這些訊息會令到營商環境及市場不好，會令大眾失去信心。

田啟文坦言政府未有考慮支援業界，又沒有聽訴求，反而保就業幫助大企業。他說：「點解嗌晒救命又唔理，惠康、百佳冇叫畀錢、炒人，就貼夠畀佢！嗌救命的出晒聲開埋記者會，都係冇件事，依家擔心整吓整吓，大家都意興闌珊，投資者不一定要做，有錢不如做善事好過啦！講數據最好，先畀信心市民，戲院全面開放嘅話，大家知道冇事。若然我做生意，自己做唔掂都心甘命抵，依家係有生意唔做得，租又要交，燈油火蠟冇少過。」

田雞又指院線減少，本土製作相應都會減少，因為電影本身不夠戲院排片。他說：「依家減少一條院線，前車可鑑，人地睇UA都執笠，自己做乜排一啲無競爭力嘅戲，寧願賣多兩張飛啦！就會更加扼殺本土電影，除非香港政府話唔會繼續支持香港電影、電影發展基金收返十億，一係有咁嘅政策公布，大家就知道唔好再留戀，既然要做係咪應該聽吓業界聲音幫吓業界。」

Golden Scene（高先電影）老闆曾麗芬表示：「感覺非常之可惜，1985年創立嘅UA Cinemas ，當年喺沙田UA 6引入迷你戲院，帶動咗全新嘅戲院文化，其後引入IMAX影院同網上售票系統，為電影院觀眾帶嚟更多選擇。」


車淑梅亦在社交網留言說：「告別了，UA戲院！那裡有很多美好回憶，這不單是戲迷的壞消息，也是意味著將有很多人失業了……幸好公司的領導層首先回應 : 先要照顧員工！有人情味！」


導演陳詠燊亦在社交網留言：「UA結業，對行業的打擊當然大，祝福每一位在UA工作的同業能盡快找到更好的發展。然而另一重點是，香港六間為視障人士提供服務的自選口述影像影院中，UA佔了四間，它們的結業讓香港口述影像的發展又倒退了幾步。戲院，是一個地方藝術文化的重要陣地，一定要守住。觀眾朋友們，請支持香港電影業，未來的日子可以的話，盡量到戲院見好嗎？
多謝。」