【獨家】唔怕余詠珊失勢牽連老婆 蕭正楠愛入廚餵飽黃翠如

熱愛下廚嘅蕭正楠（阿蕭）跟10位米芝蓮餐廳大廚攜手主持myTV SUPER煮食節目《Testing Menu》。蕭正楠係家中大廚，就算去年底因為冇戴口罩訪問過有員工確診嘅食店要強制入住隔離營，入營前都為老婆黃翠如煮定好餸，讓她「獨守空幃」兩周時依然有啖好食！他笑說：「有個人等住你煮畀佢食，我同佢都係幸福嘅！」採訪：方騫平 攝影：譚壹致

《Testing Menu》經已上架，蕭正楠跟10位大廚於每集挑選一款食材創作食譜，研發成為米芝蓮餐廳新菜式。阿蕭表示，最嚴謹係做日本餐，除注重食物外，就連食具擺位及食用次序都好講究，大家對主廚恭恭敬敬，要90度鞠躬，所以有壓力。至於最有滿足感就係做大良炒杏仁奶甜品，作品相當有水準，好想同翠如一齊分享。

努力工作唔怕人事變動
蕭正楠係家中大廚，最擅長整爸爸傳授嘅秘製咖哩雞：「細個見到爸爸喺廚房猛火炒呢道菜，煮到背脊係咁流汗，到我大個落手落腳先知道原來整咖哩雞係好複雜，所以每次食起嚟好有父愛嘅感覺，翠如都好鍾意食，但我要遷就佢減辣。」問他可有想過將來煮畀兒子吃？他坦言有憧憬過個呢個畫面：「我都好想將爸爸嘅愛交畀個仔，但生兒育女呢方面隨緣，𠵱家環境咁惡劣，一個病影響晒成個世界，唔好勉強。」提到余詠珊失勢，被喻為「余黨」(余詠珊愛將)嘅黃翠如可擔心受牽連？蕭正楠即護妻：「咁破冰記者會，星夢唱片同事都喺度，證明公司都要繼續用人㗎啦！而且翠如主力拍劇及做主持，我諗只要做好本份，公司係會睇到佢嘅努力，佢工作如常亦冇擔心過。」