【獨家】參加《造星III》認清演員路 KiKi榮幸有機會做姜濤媽咪

25歲的KiKi（張凱娸）參加《全民造星III》雖然在30強止步，但她認為這次比賽得着甚多，除了令她識到好多真心朋友，當然還包括跟KLAU（劉瑞祈）撻着進展成拖友，最重要是認清自己未來的演員方向，她直言好想趁後生拍青春劇，對於早前拍ViuTV劇《太平紋身店》飾演姜濤媽咪，她更笑言感到好榮幸。撰文：杜淑霞　攝影：譚壹致 服裝：Alice&Olivia 髮型：Alex So@The Attics 場地：The AIR (The ONE)

KiKi最初原來冇膽又想挑戰《造星III》，全靠公司鼓勵，「本身好想參加呢個比賽，但我又好驚，係公司鼓勵我，相信我有潛質，叫我去參加。」後來幸好有同門的ANSONBEAN做伴，「最初驚擔心自己能力上有不足，同埋覺得孤零零冇人陪，入咗圍就知有ANSONBEAN，個心都定啲有個照應，同埋好proud off公司有個咁勁嘅弟弟。」


自責偷偷喊


對於KiKi來說，參賽以來最困難的地方就是跳舞，「如果Zeno話自己係災難級，咁我係世界級災難，我真係唔識跳舞，我自己心理壓力好多，好緊張，但我有演戲底，唯有盡量去模仿，攞能量出嚟跳到好enjoy咁，但係點跳都唔及佢哋好睇。」雖然同門有跳舞出名勁的ANSONBEAN，但KiKi笑指自己資質太差幫唔到手，不過她承認參賽後跳舞確實有進步，至少記step快手很多。



KiKi認為《造星III》就好像娛樂圈縮影，最難得能夠在比賽中認識真心朋友，「你冇諗過畢業後，工作都可以識到一班真心朋友，呢樣嘢真係最開心。我最開心遇到彭秀慧，我本身好欣賞呢個老師，佢唔單止係我哋item嘅導師，佢仲教我點樣做人，令我挑戰自己，亦都知道自己能力係好不足，自己興趣喺演戲度，認清自己鍾意啲咩，呢個喺我事業方向有好大得着。」

恨拍青春劇

完成了《造星III》後，KiKi更加清楚自己應該走演員路，而對於角色她亦有好多想法，「我一直都好恨，好想做一啲青春愛情題材嘅女主角，譬如好似《想見你》嘅柯佳嬿咁，自己都25歲，趁住自己着校服仲似就拍咗佢啦！哈哈！同埋柯佳嬿個角色唔係好單一，係演緊兩個角色，會有好大發揮。另外，人格分裂嘅角色，多重人格角色，我都覺得好好玩。」

最近KiKi先後「嫁給男神」Lokman（楊樂文）＠MIRROR和朱鑑然，對於在ViuTV劇《太平紋身店》和廣告跟他們合作，她都覺得相當難忘，不過最特別反而能演姜濤媽咪，「有睇《造星》1、2集，Lokman舞台上好Charm，合作後發覺佢好平易近人。其實知道姜濤係我嘅仔仔時，我係吓……，我要做姜濤阿媽！？有冇咁老呀！但後來知冇對手戲，唯一係佢對住我遺照奉茶，我覺得is my pressure！嘩！姜濤斟茶畀我飲呀！作為媽媽好安慰呀！哈哈！」提到阿朱KiKi一樣有讚冇彈，「佢好健談，佢拍廣告都好專業，只係見膊佢都交戲畀我，等我可以快啲入戲。」

慘變第三者

講到跟KLAU拍拖，KiKi解釋兩人早在《造星III》前，她參加ViuTV《對號入座》透過KLAU好兄弟阿神（曾贊學）等人介紹認識，不過她笑指自己只是KLAU和阿神之間第三者，「佢哋成日話我係女版阿神，因為阿神都係白羊座。（原來係因為鍾意阿神先鍾意你？）係呀！我只係阿神替身，我唔夠膽同阿神鬥啦！佢梗係正室啦！我呢啲介入佢哋關係㗎咋！但係我唔甘於做第三者，要畀個下馬威阿神。」


跟KLAU認愛後KiKi認為反而有好處，「𠵱家發展落去大家都好舒服，呢樣可以係我哋嘅弱點，亦都可以係我哋優勢，有種互補不足作用，佢係歌手我係演員，大家一齊喺作品上同工作上交流，佢教識我好多嘢，同時間我都畀到啲意見佢。」至於被影到煲煙，KiKi承認作為公眾人物會注意，「講真唔怕形象受損，我係演員唔係偶像，冇乜偶像包袱，都唔怕影響形象，雖則咁講，但身為公眾人物，都應該注意吓。」KiKi還預告將會跟KLAU有合作計劃，「我哋都想音樂上面會唔會有啲火花？應該好快會有cover會出。」