【獨家】唔捨得《流行經典》 薛家燕贊同節目見好就收畀多啲機會新一代歌手
2021-03-16 16:28 
曾志偉上任無綫副總經理掌管綜藝及音樂，搵埋何麗全出任「星夢娛樂」行政總裁，仲開綠燈畀3大唱片公司歌手重返宣傳新歌，𠵱家TVB成個綜藝玩法唔同晒。由薛家燕主持嘅《流行經典50年》被全新面貎嘅《勁歌金曲》取代，革新後嘅《勁歌》安排喺四月，周日晚上9點半播出，正面硬撼ViuTV音樂節目《Chill Club》。3月30日家燕姐71歲生日當晚錄影最後一集，個半小時加長版嘅《流行經典》後便正式告別。
今午家燕姐如常入電視城為晚上錄影綵排，她帶點依依不捨神緒接受本報訪問說：「個節目都做咗近4年，一直都好受歡迎，不過，其實每次請嘉賓及揀歌都幾難，幾頭痛㗎！𠵱家總算係告一段落，見好就收係好事。之前喺節目度，好畀面請返一啲歌手，復出上嚟開心吓，亦有啲歌手因為呢個節目紅咗上嚟，呢啲都係開心事。咁當然係唔捨得嘅，但天下無不散之筵席，他朝可能又再相逢，都多謝大家啦…今日下午綵排時突然有人話『萬歲』請食嘢，仲有一日就完成，我諗最後一集大家當聚吓，會隆重啲，請多啲嘉賓上嚟玩。」
她明白公司改革用意：「新計劃畀多啲機會新一代歌手全面演出係好事嚟，呢啲都係我哋期待嘅嘢，咁樣樂壇先會再度蓬勃囉！咁樣大家都開心㗎！」
關鍵字
最新回應