【獨家】聞廖啟智病逝難接受關寶慧袁富華望《兩夫妻》可重演

2021-03-29 09:00

關寶慧和袁富華（Ben）最近首度合演由鄧樹榮執導的舞台劇《兩夫妻》，昨晚順利完成11場演出，兩人很感恩能在疫情下場場爆滿，所以很期待能盡快重演，而導演鄧樹榮承認已有計劃，但要待場地安排。當寶慧和Ben哥得知廖啟智病逝消息，兩人大感難接受，他們只望智叔一路好走及其家人保重。採訪：杜淑霞

完騷後，寶慧和Ben哥到大堂跟觀眾合照，兩人亦大談演出後感受。寶慧說：「11場演出好順利，場場都爆晒，真係開心到不得了！原本打算做20場，但啲飛到開始演出先賣晒，想加場都加唔到，希望導演可以安排重演，真係唔捨得，啱啱先熟識成件事就話完啦！」她又要感謝戲中「老公」，「佢幫我好多，佢同導演不斷提點我，係畢生受用！（Ben：唔好咁講啦！）真係㗎！我冇留意到嘅嘢，全部係佢哋教我㗎！我做演員會有盲點，佢哋全部留意到。」

搞笑打算結婚

Ben哥就覺得疫情下有此成績好感恩，「初頭都擔心唔知排得咁辛苦有冇得做，大家有個信念，努力就有回報，初頭啲飛唔係去得好好，慢慢就嚟。」他亦好贊成重演，「頭先我都咁樣同佢講㗎！我哋沉澱吓，等佢再rerun，將個感情再深化啲。」笑他們「夫妻關係」再深厚啲先重演，寶慧即講笑話：「不如我哋試吓結婚！（Ben：唔好試啦我哋直情結婚！）聽日去註冊，註咗再話你哋知！」

本來兩人心情輕鬆，當告知智叔病逝消息，他們即時面色一沉，寶慧不停說：「點解會咁快㗎！」之後定過神才說：「我喺TVB時同智叔合作過兩套劇，一套係《射鵰英雄傳》，一套我哋仲演情侶，真係好難接受，點解會咁㗎！希望（陳）敏兒保重，智叔亦一路好走。」Ben哥說：「我同智叔《煙雨紅船》係第一次合作，跟住有啲電影都有合作過，佢係我一直好尊敬嘅演員，希望佢屋企人要保重，大家真係要珍惜當下，呢個消息實在太突然，真係消化唔到。」　