逾300粉絲撐場變大合唱 Edan「打回圓形」演唱會唔騷肌

2021-03-31 18:30

MIRROR成員Edan（呂爵安）今日到旺角出席奶茶活動，吸引超過300名爵屎（Edan粉絲稱呼）到場，相當熱鬧！Edan即席清唱其Solo曲《E先生連環不幸事件》，但最後演變成全場大合唱，足見一眾爵屎的熱情。他指Fans應是「餓」了很久，因MIRROR已很久沒有公開活動：「又或者演唱會買唔到飛，嚟見吓真人，哈哈！」

演唱會門票一票難求，Edan表示自己只留票給家人和相熟朋友，不算一身「飛債」，但比較擔心體力：「出道時開1場都成個人死咗，估計今次6場會好攰。之前得一半入座率唔夠喉，現在加場又有75%入座率就開心啲囉！」姜濤指自己到時會表演樂器，Edan無懼對方挑機：「佢係驚喜定驚嚇先？哈哈！我到時會自彈自唱《E先生》，已經好少邊唱邊反白眼，不過Fans又話我經常合埋眼，都要多練習表情管理。」

雖然Fans無緣在演唱會見到Edan除衫，不過他透露自己在港版《大叔的愛》有騷肌戲：「我一度練出腹肌㗎，不過已經『打回圓形』，所以開騷唔露嘞，留畀Stanley同Alton啦！若果他日再變返咁Fit，我唔介意表演除衫彈琴！」咁會否與合演《大叔的愛》的隊友Anson Lo在台上咀嘴？Edan笑說：「我OK呀！咀嘴唔使練，但唔知花姐畀唔畀喎！」他又自爆二人在劇中加了激咀戲，「我益咗佢啦！阿媽都戥我蝕底呀！」