十年冇入過TVB錄影廠 袁詠儀唔排除拍TVB劇

今日，由余安安、羅敏莊和陳凱琳擔任主持的TVB全新節目《日日媽媽聲》進行錄影，邀請了袁詠儀（靚靚）、鄧兆尊（兆尊）及張慧儀等擔任首集嘉賓，為隆重其事，TVB首席創意官王祖藍亦到場支持。


袁詠儀稱自拍完草蜢主持的《華麗明星賽》後，已有十年冇去過TVB錄影廠，即被傳媒指她只顧返內地賺錢？靚靚說：「唔關事，主要係冇項目特別吸引我，但今次呢個節目好好。」她透露這次是由曾志偉落命令王祖藍負責邀請她，而她跟羅敏莊好耐冇見，又想見吓師妹陳凱琳便速成這次合作。

靚靚不排除日後再跟TVB合作，自言有好多想法並已跟監製說，有合適的話可以找她，她指出，現在是很需要正能量和開心的氣氛，所以她最想拍一些吃喝玩樂的節目。問到可會與老公張智霖以夫妻檔為TVB拍節目？她笑言：「暫時唔好嘞，我哋喺內地一齊演出都唔少，始終我都係一個靚女，有自己事業。哈哈！唔想佢拉住着我，阻頭阻勢。（阻你發達？）大家咁話啦！（會否接拍TVB的劇集？）演戲係我最喜歡嘅工作，但要視乎題材適合及時間，始終年紀大體力未必負荷到，如果要長時間就唔可以嘞。」