林文龍拒提名愛女選港姐　謝天華不介意仔女入娛樂圈

亞洲心動娛樂（AMM）副總裁林文龍與好友謝天華，日前作客網絡音樂節目《限聚音樂Hear To Feel》，暌違15年再合作的他們首次同台「開金口」，席間又摸住酒杯底大談湊女經，並細說入行逾30年，在演藝路上不為人知的笑與淚。

由《超級新星選舉》出身的林文龍，憶述從訓練班畢業後當了兩年跑龍套，他說：「古裝片一定演衙差，時裝片就揸住『大哥大』跟黑社會大佬；我試過喺《太平天國》同時扮演4個角色，演完清兵、再演舉人同死屍，因為公司計算好精準，臨時演員以日薪計算，訓練班嘅人拍幾多日都係一樣薪酬，所以我哋好好用。」跳唱起家的天華也坦言，從歌手轉型演員的過程中，曾為演出機會做盡大小奸角：「例如姦淫擄掠、打女朋友、變態殺人犯等等，我唔介意，乜嘢角色都做，最重要係演出機會。」

談到事業樽頸位，天華表示試過9個月零工作，因每天無所事事而影響情緒：「當時唔係好想見人，最後我揀咗一個星期六，去銅鑼灣最多人嘅三角位，行返入人潮當中，慢慢就好番啲，算係自己救番自己。」林文龍亦表示年輕時個性剛烈火爆，吃上不少苦頭：「低潮時，人哋會覺得少一個對手，佢就多一個機會，當下我係深深感受到呢句說話。」天華聞言也認同好友率性，笑指對方是「娛圈奇葩」：「簡單嚟講，你當時就係得罪人多、稱呼人少，其實你喺呢個圈生存到，真係一個奇蹟。」

近年不少星二代跨足影視圈，問可會支持子女入行？愛女心切的林文龍即Say no，更搞笑稱拒絕提名女兒林天若參選港姐：「目前為止，我覺得我個女應該唔會入行，因為佢個性內斂，喺學校着泳衣上游泳堂，佢都唔係好想，所以佢見到人哋參加港姐都擰晒頭。（如果佢話媽媽都係港姐出身，然後識到你呢？）我會同佢講，唔係個個都咁好彩㗎，哈哈哈。」至於天華表示會放手讓囝囝嘗試，但若然女兒擁有港姐夢，他爆笑秒回：「我唔會做佢提名人㗎！不過如果佢想拍戲，我諗都會畀佢試吓。」