【維港會】英女皇訪港藏品升值 一張報紙值幾百蚊

英國皇夫菲臘親王逝世，引起唔少港人緬懷昔日嘅香港，收藏界又掀起搜羅英女皇同皇夫嘅舊物熱潮。專門收集本土舊物嘅Select 18店主 Mido話，本地有人專門收藏英女皇同皇夫訪港嘅舊物品，尤其附有中文繁體字嘅就特別搶手，好似兩人訪港期間嘅紀念品，近年炒到好高價，相關舊報紙嘅報道亦升值。

皇夫菲臘親王去世，享年九十九歲，較年長嘅港人會記得佢，因為佢同英女皇先後喺一九七五年同一九八六年訪港，親民嘅形象，深入民心。呢兩次訪港期間，不論係港英政府或民間都推出唔少紀念品，好似兩人出席宴會嘅餐單，係收藏家必爭之物。Select 18店主 Mido話，有關餐單市值幾萬元，有錢未必買到。至於兩人訪港嘅新聞報道，一張都值幾百蚊。

Mido話，英國本土有好多關於英女皇嘅舊物，但數量太多，又以英文書寫，唔係好多香港人收藏，但英女皇伉儷兩次訪港嘅紀念品，尤其有中文繁體字嘅，好有本土特色，一喺市場出現，就會被人搶購。佢自己家中收藏一個一九五三年紀念英女皇登基嘅鋁杯，上面刻上「天佑我皇」四個中文字，非常罕有，幾多錢都唔會賣喎！