爆黃樹棠早已離婚　兒子黃榮璋：你哋對我好好唔需要內疚

2021-04-20 16:17

資深藝人「求叔」黃樹棠（棠哥）本月因肺癌病逝，享年77歲，並將於下月5日假世界殯儀館設靈，當晚8至9點安排公祭，讓大家送棠哥最後一程。其任職配音的兒子黃榮璋（章魚）今日凌晨在社交網撰文，透過一字一淚抒發掛念亡父亡母及親恩之情，他寫道：「唔知點解對眼好似閂唔到個水喉，我好似一路記番起晒以前好開心嘅記憶，佢哋由細開始就好錫我，阿媽唯一一次揸住衣架想打我，追追吓都會變成一齊大笑，好開心咁冇咗件事，阿爸係一個武功高強嘅人，佢實打過我？對唔住，係無！佢兩個錫到我燶……而家兩個都唔喺度喇！媽媽嘅事好不容易先可以放下……佢哋不約而同地喺走前都有提及離婚嘅事，對我嘅影響係最大，有點點對我抱歉……」

早年，棠哥與胡桂蘭結婚並誕下兒子章魚，2005年胡桂蘭因癌病離世，棠哥一直沒提及離婚消息，直至他離世後，章魚才首次談及父母早已離婚，令他有一個不一樣的童年，不過跟父親感情深厚的章魚留言，安慰父母不需內疚，他續道：「我而家想同你哋講，你哋對我好好唔需要內疚，我一樣都係幸福的！你哋兩個都係我最重要嘅人！教識我好多做人嘅道理。近呢十幾年我都同我爸相依為命，似兩兄弟多過父子，你冇錢有我頂住，我冇錢有你頂住，出生入死，雖然拗撬一定有，但係父子冇隔夜仇。」章魚又引用父親近年每日都會講的一句「簡簡單單又一餐」，表示永遠都會銘記於心，認為人唔需要貪心，要知足。最後，他說：「我好掛住你呀！爸爸！」