練拳唔夠師姐打 林作死撐：鍾培生恐怕凶多吉少

林作與鍾培生將於9月舉行「百萬擂台之戰」，對拳擊零經驗的林作，率先參與下月1日舉行的「Energy Fight 2021」，與其他對手一較高下。林作今日進行拳擊訓練與師姐對打練習時，師姐邊打邊講：「咁衰，蝦女人！咁多口。」林作則無力招架，全程捱打。
林作透露已接受拳擊訓練有二十幾堂，每日也會練拳，心情好的話會加強操練，但最少也會上一堂。問到跟鍾培生對打可有信心？他說：「信心十足！（跟師姐對打時表現遜色？）這個策略，師姐係專業冠軍級，女人都可以好打得。（師姐鬧你蝦女人？）她教開我，相處都一段時間，係人都需要發洩吓。」對於下月首次參與拳賽，他表示心情不緊張，又搞笑指今日記者不夠多，試下有幾百人在現場的話，看他好不好打。他說：「我都係睇吓觀眾興奮度，如果有美女坐陣會勁多幾倍。」

被問接受拳擊訓練後可有說話跟鍾培生講？林作說：「如果打親他，真係sorry！個多月前先接觸拳擊，我覺得人生最大體會唔係讀書、做大律師、入娛樂圈、老師，甚至唔係做保險，係做拳手，我接觸得太遲啦！早啲嚟搵我嘛，可能我係曹星如個大佬。」
提到9月之戰，鍾培生有意邀請麥明詩到場觀戰，林作表示沒有參與任何組織，不清楚對方如何安排，亦當自己是嘉賓去參與。他說：「仲有4個多月時間，有信心！他恐怕係凶多吉少。」對鍾培生為應戰戒色，林作說：「佢要戒，佢虛嘛！我唔使戒，我滿滿的愛要釋放出來畀大家，我唔煙、唔酒，色都唔係好色，來來去去嗰個啫！佢好似多啲。」