康華貴州山頭拍節目遇怪事滕麗名分享邵氏拍劇靈異經歷

2021-04-26 20:45

由邵氏製作的《Master's Talk師父有請》第12集邀請到滕麗名、白彪和康華擔任嘉賓，大談圈中的靈異事件。康華直言初入行時不太信邪，但慢慢遇到不少撞板經驗，身邊不時發生靈異事件。她憶述剛入行時到內地拍旅遊節目時遇上的靈異經歷，她說：「貴州有個山頭安置骨灰，當時咩都唔識又唔明，個山頭係安放成條村嘅屍體，我都唔明點解要去拍？來回11個鐘，入到去大家都唔信邪加上當地冇準備，所以冇拜神。」當時與她合作的男主持不適要送院，連走路都有困難，導致餘下的拍攝工作都由她應付，其後她回港亦因不適送院。她表示：「我諗我哋入去之前冇打招呼，冇講『唔好意思』，個男主持返香港冇幾耐，就冇做呢行，當時佢病到神智唔清醒，成日自言自語，好彩我之後返香港有拜番神。」

同場的滕麗名指現時自己對靈界事物的強烈天綫已經關門，不過她早期亦遇過不少靈異事件，她憶述：「拍《真情》年代，8至9廠附近個廁所好猛，話（靈體）好多年前邵氏年代已經喺度，當年成日通宵拍攝，男女廁黐住喺隔籬，但女廁塊鏡永遠都係滴水，而男廁塊鏡永遠都係乾。」有次，她為另一部劇集進行拍攝，服裝間有個巨大觀音對着廁所，但她剛好遇上服裝間關門，她不以為然走到洗手間，她的身邊沒有其他人在，但她竟看到鏡中有另一人出現。

阿滕續道：「邵氏真係好猛，我每逢初一、十五就會見到有人拎住火盆去拜塊鏡。有次喺凌晨2點開工準備埋尾嗰陣，收音師話聽到有人吹口哨，咁就閂廠門啦，點知都係有聲，咁大家就話不如大聲少少就盡快收廠啦，後來係有人喺我耳邊吹。咁我都算啦唔想理，點知隔籬廠張家輝開緊《騙中傳奇》，佢又喺度嗌救命，當時佢大叫：『有人喺我耳邊吹口哨呀！』呢單都幾爆，因為我哋兩個廠中間有個化妝間，根本唔會係通到聲。」阿滕更直言北上拍戲遇到大大小小的靈異事件，但由於環境不能夠改變，她唯有嘗試跟靈體做朋友。另外，同場的白彪自爆曾瞓過停屍間的屍箱，當時櫃門一關上，耳仔頓時嗡嗡聲兼毛管戙，主持麥玲玲指白彪哥有關刀眉，作為武打出身的人殺氣較大。