【維港會】學生皮鞋未乾穿拖鞋被罰小過或整月脫鞋 港媽猶豫應否投訴

有網民在網上討論區「親子王國」發文，指就讀中學的兒子在雨天因皮鞋未乾透，貪方便就穿拖鞋回校，結果被老師懲罰記小過否則就要整個月在學校都要脫鞋，兒子希望媽媽介入，令她不知如何是好。

港媽指，兒子就讀的中學，校規嚴格，必定要穿整齊校服才可以回校。但因為之前下雨令皮鞋濕咗，他於是就穿了對拖鞋上學。港媽當時有提醒過「佢用風筒吹返乾皮鞋，但佢唔聽，一意孤行貪方便着拖鞋」，港媽還表明：「你唔聽冇問題，但你比老師罰唔關我事！」

港媽近日洗衣服時才發現兒子白襪底全部是黑色，「佢就話因為俾訓導Miss見到佢着拖鞋返學，罰佢一係揀記一個小過，一係一個月返到學校就要除鞋，淨係可以着襪」

兒子大為不忿，希望媽媽代為出頭投訴，但她覺得這樣做好似縱壞了兒子。「呢件事情其實我想俾啲教訓佢，等佢明白尊重校規嘅重要性。第日出到嚟社會，冇人會教佢。」港媽又補充，後來學校訓導老師來電稱，如果有家長信可以酌情處理，這個月讓兒子穿黑色襪，這樣大家感受上可能較好過。港媽於是不知該如何處理。

港媽又透露兒子以前也曾不服從學校權威，「阿仔試過放假交請假信，冇着到校服。書記姐姐叫佢着返套校服先至嚟交。阿仔竟然發晒脾氣，問『點解我入一入學校交封信都要着成套校服，我屋企好遠，我唔想換』後尾學校打電話嚟話我個仔發脾氣，我話比次機會佢啦，佢由新界過嚟。但書記姐姐好堅決咁講『入得呢間學校入1秒都要着校服，呢個係尊重嘅表現，唔會有酌情權』」

有家長就指，「唔會投訴，二揀一配合。一早叫佢唔好佢又唔聽」、「唔會投訴學校，信可以寫」、「唔會投訴，根本唔應該着拖鞋返學，但會幫佢寫信」。

有嚴厲家長指不會介入，「我乜都唔會做, 校規一定要遵守, 後果要自己負責！ 難得學校肯教。 在學校犯錯最多都係畀學校罰, 外面犯錯分分鐘要坐監！」「、唔會幫，已經有提醒佢都唔聽，後果當然要自己負責，中學對學生衣着服飾都有嚴格規定，學生都要服從，今次比佢學習一次」、「唔會投訴，但會同學校老師反映個仔想投訴，希望老師、社工留意下囝囝情緒，注意下行為，依家小朋友好叻。好可能做啲出位事要脅大人。聽過同學仔媽咪話個囝反叛期，係學校爬欄杆企跳嚇老師，為求唔洗罰留堂」

不過家長就提出異議，「我覺得學校嚴得嚟個懲罰唔合理，着鞋係有保護作用，因地下可能會有釘或石仔等會整傷腳板，而且長期唔着鞋行路對成長中嘅學童會造成扁平足。我覺得罰係可以，但唔係咁罰！比我會同學校商量另一個可行方案，或直接接受記一個小過，等佢知驚。」、「但因為校服唔整齊而罰，係罰無得着鞋一個月，咁校服依然唔整齊。加上對襪整污糟，最後又係家長洗，變相罰埋家長，畀我寧願直接記小過。完全理解唔到為咩要罰無得着鞋一個月，轉頭又可以寫信求情着黑襪唔着鞋，但基本上夏季校服要着白襪，因為罰而要着黑襪，件事變咗本末倒置。家長要買黑襪，又要煩點寫信，畀俾我真係唔會理，既然呀仔揀咗罰着白襪一個月就由佢啦，襪都要佢自己洗返，要佢學識承擔責任同後果」

有人表明學校不合理，「罰係應該，但記過太重了，唔着鞋一個月仲更加離譜，我係家長一定投訴，呢啲學校真係無言」

帖文轉載自「（急問！）究竟我咁樣做會唔會太嚴」