隔離後被召返公司照肺 吳業坤跟193合作唔覺有矛盾

吳業坤早前於日本完成工作假期回港，事隔半年再次亮相TVB節目《勁歌金曲》。坤哥說：「其實隔離完都有返嚟見高層，照吓肺，問吓做乜咁耐唔返嚟。都好好，因為我行咗東海道，話畀兩集我介紹吓個地方。（咁錫你？）係呀，好好彩，成日都話走咗無人理你，好彩都返到嚟，大家仲記得我。」

坤哥日前跟193合照，正值電視大戰，193又言行出位，可有被公司訓話？他說：「公司好大方，兩年前（演唱會）有邀請MIRROR做嘉賓，樂小姐（樂易玲）都有嚟睇，大家都好開心，唔覺得會有呢啲矛盾出現。大家有言論自由，大家係朋友。想玩一啲想玩嘅嘢。點解會一齊出現呢，因為我飛之前有講過一齊做Cover，開劇前有時間，就見過面傾吓，無乜特別。」問到公司反對合作可會取消？他說：「如果有適當理由，如果廣告品牌上撞咗，如果合約上有問題，當然唔會做啦！但依家講緊網上嘅合作，因為都同好多唔同歌手合作，所以都無考慮太多唔同因數。」

坤哥提到回港後節奏上不太習慣，笑言於日本做廢青會避開繁忙時間。問到可有認識到日本女朋友？他說：「識到啲朋友嘅，男女都有，擴闊咗生活圈子，之後通關又可以再見下面，增進友誼。」問到可有對象？他自言想法開明，不排除任何可能性，笑指香港人對他十分熟悉，要由零開始到發展，可能需要不認識他的女仔。他說：「我去到日本都唔會介紹自己係歌手，介紹係KOL。」