【獨家】慳家買膠樽自製消毒酒精　陳漢娜出街防疫意識好高

27歲的「文青女神」陳漢娜（Hanna）早前於港產Cult劇《把砒霜留給自己》中，一脫「暗黑」形象扮演喜感十足的「小騙子」，令人驚喜。去年受疫情影響，工作量驟降至全年收入得5位數的她，最近都開始接番唔少Job，稍後更與MIRROR成員Lokman、Stanley及凌文龍合演ViuTV新劇《IT狗》。日前《頭條日報》記者影到Hanna單拖落銅鑼灣，全程「厭世樣」兼高度戒備驚「中招」的她，花60蚊買了兩支膠樽自製消毒酒精，畀錢後便火速搭綠Van返屋企。採訪：梁志明

日前晚上7時許，陳漢娜獨自現身利舞臺廣場MUJI， 一頭黑金挑染捲髮、戴上銀色大Headphone的她，在店內兜咗一圈便極速擸走一支32蚊的噴霧式膠樽，以及一支28蚊的PET噴霧式透明膠樽去畀錢，未知是否打算慳得一蚊得一蚊，自己Homemade消毒酒精拎出街用呢？排隊期間，Hanna左手臂挽住剛從超市掃走的大袋食物，右手夾實兩支膠樽，雙手全程環抱自己，好似好驚掂到其他嘢咁，只敢頭擰擰碌大眼左右望；直到行去櫃枱前，她先禮貌地脫去Headphone埋單。

小心為上
由於本港疫情反覆，Hanna買完嘢都唔敢周圍走，直接步行至鵝頸橋附近的小巴站。排隊登上綠Van後，她即揀了近門靠窗的位坐下，一直揸住蒸餾水的Hanna隨即拉低口罩飲水，大口大口灌了幾啖水後，她又快速將口罩拉番上鼻樑，非常小心。