【維港會】數碼港疫下靈活改善園區 照顧上班及消閒需要

數碼港前排上咗立法會匯報工作進展，兼且介紹數碼港擴建計劃，講到推動創科發展，議員普遍都支持，亦有興趣了解數碼港點樣善用現有同未來落成嘅設施。要為香港創科發展打下根基，空間當然係關鍵，數碼港擴建能夠提供更多辦公室及共用工作間，比更多初創公司有空間大展拳腳。據知疫情期間，數碼港亦靈活改裝咗部分會議室變成工作空間，俾更多初創公司使用，支持佢哋繼續發展，一啲都唔嘥。

至於數碼港商場早排因為疫情少咗啲人，但自從放寬限聚令後，據知商場戲院、餐廳都多返好多人。而為照顧喺嗰度返工同放假去玩嘅人，數碼港喺商場開加咗新餐廳、商舖等，仲畀初創測試產品，包括消毒機械人、便當販賣機、膠樽回收機等，充滿智慧生活元素！

聽講擴建計劃會改善海濱公園，仲會增加公共空間，相信未來數碼港除咗會繼續支持香港創科發展，仲會成為一個好多人去既景點！