演唱會後攰到瞓足廿個鐘 姜濤揀黑超心得最緊要大副

MIRROR上星期才完成6場演唱會，不過姜濤騷後繼續做大忙人要開工。他獲眼鏡品牌邀請到店鋪，搭配各款太陽眼鏡。姜濤憶述人生第一副太陽眼鏡：「細細個同媽媽去加拿大旅行，佢喺海邊嘅一間小店買咗副太陽眼鏡畀我。我整個旅程都有戴住，仲覺得自己變咗外國人。」小時候的姜濤對揀太陽眼鏡好有「心得」︰「我揀咗副鏡片比較大嘅，因為覺得同一個價錢，感覺好似抵啲。同埋我成日會借媽媽嘅太陽眼鏡嚟戴，細個覺得太陽眼鏡係無分男女裝。」

問到如果能放一日假最想做乜?姜濤最想瞓覺︰「我喺演唱會後都休息咗一日，真係全日喺屋企瞓，起碼瞓咗十幾二十個鐘。雖然內心係想做吓其他嘢，例如睇電視或打機，但真係太攰，最終都瞓咗成日，好似昏迷咗咁。」踏入夏季，姜濤與媽媽一樣，怕熱又怕出汗︰「平時同媽媽出街，我一定會帶風扇，因為佢好怕熱。記得有次去日本玩，天氣好熱，媽媽入便利店買咗一大袋冰，全程一路行街一路攬住，仲話即刻透心涼！」