【Juicy叮】上水私家車與巴士疑爭位切線被撞向石壆 誰對誰錯網民爭持不下

上水一帶今日由上午8時起開始一度大塞車，不少市民表示入上水後，要塞大概半小時至1小時才能離開上水。網上流傳片段，可見今日上午上水馬路有一輛巴士疑與一輛私家車爭位入線，令後方的私家車撞至衝向石壆，引起網民熱議。

一名網民在「馬路的事討論區」上載片段，可見一輛巴士與一輛黑色私家車同時轉彎後，兩架車早同時嘗試逼入右邊的行車線，最終巴士成功「cut線」，將後方的私家車撞歪。私家車被正在行駛的巴士車身撞至石壆，搖晃了好幾次。樓主在帖文寫道：「今朝上水大塞車元兇其中之一」，引來網民關注。

不少網民指私家車不應在此情況下仍強行與巴士爭位：「巴士明明夠位先過、新牌仔仲去油放前車自殺」、「架巴士已經cut左個入黎，私家車都仲繼續俾油」「明顯私家車冇留意情況，左線前面有部雙層壞車，巴士過線前應該係見到私家車第一次停定以為讓就開車，加上過彎前私家車在巴士右後，巴士已經讓左私家車前面個部，第一次停定比巴士先應該係夠位」、「私家車停左兩次。搞到巴士司機以為佢讓巴士出先。其實如果唔讓人出。做咩要停車。私家車個司機唔識留意路面情況應變駕駛。始終都會出事。」

亦有網民指，巴士司機如此「cut線」係「硬cut」，而撞到私家車後仍繼續行駛亦過份：「首先唔好討論邊個唔讓邊個，架巴士一半都未過到就硬cut隔離條線，就算架私家車唔車前少少㗎巴士車尾一樣會撞落架私家車度。」、「巴士由頭到尾都諗住壓過隔離線，完全無諗過行番自己條線，原來咁樣都要讓㗎，cut線都講禮貌呀」、「轉緊彎攝巴士彎就話姐，彎都入完啦...巴士cut線唔洗睇夠唔夠位? 撞完重行前咁遠...係聽唔到／睇唔到撞左? 」、「唉！讓一讓吾會死架。係要搞到甘先開心」

不過，今早上水大塞車的主要原因，應是與彩園路寶石湖邨交界地下渠爆裂有關，爆渠導致整個上水於今日上午都超級塞車。

資料來源：「馬路的事討論區」