【維港會】信和華置「打針送樓」 確認包埋印花稅律師費

「打針送樓」話題近日熱爆香港，不少網民關注，若然抽中千萬元單位，印花稅都唔少嘢，唔係人人都可負擔得起。《東周刊》專欄政官莊就披露，信置方面大派定心丸，呢個終極大獎會包埋印花稅、登記費及律師費。

信和、黃廷方慈善基金及華置為鼓勵市民接種疫苗，度了條「打針送樓」好橋，可謂轟動全城。今次送出嘅「凱滙」單位實用面積449方呎，價值1080萬元。有指單位客廳呈長方形，設有露台，景觀夠晒開揚；參與「抽樓」者必須持有香港永久居民身分證。

除咗終極大獎抽樓外，仲有機會贏取由黃廷方慈善基金送出另外20個、每個價值10萬元嘅預付卡簽帳額或信用卡免找數簽帳額。

講番送樓呢招，原來恆基地產都用過。話說旗下新都城二期98年開售時，發展商同可口可樂聯合推出買汽水可抽獎贏單位，結果吸引市民狂掃可樂，成為一時佳話。