【獨家】外母狂讚 顧家女婿街頭吹水唞吓氣 鄭嘉穎約友食快Tea急返歸

鄭嘉穎與較他年輕22歲的陳凱琳（Grace）結婚3年，育有兩子Rafael和Yannick，家庭生活好美滿。不過婚前，有傳Grace媽反對二人拍拖，早前她接受訪問時直認覺得嘉穎年紀大又花弗，擔心初戀愛女俾人玩，幸跟對方認識後完全改觀，大讚女婿以家庭為重，仲話「重到要佢減啲」！嘉穎的確心繫屋企，早前就見到佢單拖約友落銅鑼灣食Tea，全枱清一色男人，戴黑超的嘉穎開頭都好似開籠雀咁，郁身郁勢講唔停，但傾了約一個鐘便知時候要返屋企幫手湊仔，歎埋支煙就急急返歸。採訪：梁志明

獲Grace媽認證「101 分女婿」的51歲鄭嘉穎，近年常被拍得與太太陳凱琳和寶貝仔出街享天倫。鮮有獨自外出的嘉穎，日前下午3時許就相約漫畫家祈文傑及兩名男友人，到加路連山道某茶記一邊食Tea一邊Men's Talk。難得撇甩妻兒出來唞唞氣，起初嘉穎都傾得好投入，其間仲笑晒口、伸出「擒拿手」，好大動作，連《頭條日報》記者企喺對面馬路都聽到佢把聲！見枱面啲嘢食清晒依然口痕痕，嘉穎就獨自步行到附近的便利店增值八達通，然後再往小食店Order了幾隻炸雞髀。

傾得耐囉囉攣
在等攞嘢食期間，其中一名兄弟前來找他吹水；直至領取外賣後，兩人才一同回到餐廳坐低，並急不及待拆開紙包，取出熱辣辣的炸雞髀慢慢嗒。終於食飽，一班老友繼續發表偉論，但歸心似箭的嘉穎開始心不在焉，參與度極低。搭完兩句嘴，又篤吓杯凍檸茶再四圍望；其後愈坐愈冇心機聽的嘉穎，索性打側身坐煲電子煙，見他不時凝望遠處，未知係咪諗緊幾時先返得屋企呢？最終大約逗留了一小時，嘉穎跟一名男友人走到聖保祿醫院的停車場攞車離開。