傭人姐姐發脾氣嗌辭職　林芊妤傾掂數：唔使請新姐姐啦

林芊妤（Coffee）日前於IG Story問大家有否本地姐姐介紹，仲透露傭人姐姐忽然遞上辭職信！事緣，她發現姐姐餵兩歲多兒子翟德彥（翟伯伯）食飯時，經常開電視及電話給囝囝看，惟姐姐繼續講大話，唔認之餘仲發脾氣掉毛巾，最後向Coffee說自己「唔識湊小朋友」，叫對方另覓姐姐。正當Coffee為再請工人而煩惱之際，事隔數小時後，姐姐居然向她道歉，最終仲傾掂數留低，她於社交網留言︰「多謝大家既關心呀～我而家唔使請新姐姐啦，姐姐唔走啦。」

今日Coffee於IG開Live重提事件，坦言事後也跟姐姐表示謝意，感激兩、三年來對BB的照顧，讓她可放心外出工作，只是自己不喜歡別人說謊，「我同佢講已習慣佢喺身邊，大家好似一家人咁，我都唔係好習慣有其他人、要重新習慣，跟住佢就喊，同我講Sorry，佢覺得自己嗰日態度唔好，其實係佢意氣用事，唔係真係想走，希望我當聽過，所以我哋又冇事喇，唔使請新姐姐！佢都應承我以後有啲咩都會同我講，唔會再為方便、唔使煩而講大話，我都選擇相信佢，加上佢係第一次（犯），而每個人都有機會犯錯，姐姐都會有脾氣、攰、唔舒服，同埋佢離開印尼咁耐都可能好掛住自己個仔，情緒唔係咁好，變相有時會有少少脾氣，大家要互相遷就。」但她又稱，正考慮請多個姐姐來幫輕對方，故會繼續Interview。