第二次合唱仲拍埋劇勁有默契 王浩信菊梓喬召喚客戶邀請搵真銀

王浩信(Vincent)及菊梓喬(Hana)繼三年前的合唱歌《欲言又止》後，再一次為新劇《刑偵日記》合唱插曲《蝴蝶效應》，兩人日前就為新歌拍攝MV，今次的拍攝場景非常復古，Vincent亦大讚：「呢個場景勁有feel，可以話係一卡車廂，又可以話係一間旅店，個感覺就好似時光隧道，畀人好大嘅幻想空間，好配合角色嘅內心世界，多重人格抽離現實，好多謝導演嘅心思。」

Vincent及Hana齊說好開心有機會再合作，而且一齊參與劇集拍攝仲有對手戲，所以合唱及拍MV時更容易投入感情。Hana說：「今次第一次正式拍劇，對住好多好專業嘅一級演員，學到好多嘢，好正！Vincent好照顧人，就好似拍MV嘅時候，我哋兩個嘅身高實在好有距離，佢會主動提出除咗對鞋去遷就我，好sweet。」兩人表示好期待一齊宣傳唱live，因為上一首歌夾唔到時間，今次可以一口氣唱晒兩首合唱歌，最好當然係有客戶邀請拍檔搵真銀。

劇集已先於內地及網上平台播出，成績不錯，兩人希望繼續承接各平台的好成績，Hana說：「最好可以有續集，自己都愛上拍劇，今次只係一小步，時間都比較短，感覺係啱啱熟悉環境就已經拍完，期待之後有更多參與機會。」