向洪永城分享夫妻相處之道 張衞健：最緊要收放自如

張衞健（Dicky）與洪永城因合作拍《大帥哥》而成為朋友，今天洪永城和梁諾妍結婚的大日子，Dicky當然獲邀出席婚禮，其他同劇演員如譚凱琪和徐榮等人到賀，而陳瀅、何雁詩、鄭俊弘、羅子溢及TVB高層樂易玲亦有現身婚宴。

Dicky早前返內地陪老婆張茜，剛回港便趕及出席Tony婚禮：「原本準備咗驚喜畀Tony，想着《大帥哥》嘅軍服及權杖到場，但係戴口罩又睇唔到大帥哥最重要嘅二撇雞，本來諗過將啲黐鬚痴喺口罩出面，不過好似太無聊，所以最後咪唔搞，哈哈！」談到經營婚姻之道，Dicky直言最緊要收放自如，恍如「Chok泥鯭」一樣，又笑指自己離開內地時，只得自己難捨難離，老婆反而樂得清靜，不用每天被他呼喚數十次。