參賽者突被取消面試求解釋 《造星IV》明天加開即場報名惹爭議

ViuTV《全民造星IV》以全女班作招徠，日前舉行面試。據知三日面試吸引過千人參加，不少人都是為做MIRROR及ERROR師妹而來。ViuTV今日在社交網宣佈決定加開即場報名時間，明天下午2時至5時可以報名參與試鏡。不過此舉引來不少苦主嬲嬲，原來不少有意參加比賽的人都突然被取消面試。有人質問：「點解根本未in晒啲人又取消人casting，而加（家）突然walk in？扮少人參加定扮有良心補飛？」

另有網民以千字文要求ViuTV交代：「ViuTV麻煩俾（畀）一個解釋，有好多女仔收到你哋casting嘅訊息，但突然被取消，另外有好多網上報咗名從未收到casting通知，咁究竟呢一批女仔，應該繼續等，定係星期五一齊擁（湧）過去攞籌爭位？如果ViuTV你唔解釋or做一個更好嘅安排，相信唔會平息到呢幾百個or幾千個女仔嘅憤怒。其實報咗名參加嘅女仔全部都係有夢想，只不過感到非常唔公平，同埋完全唔知你哋casting既（嘅）準則係咩，點解有啲人有casting機會，有啲人冇？希望你們可以解釋！」

《造星IV》吸引大量KOL報名，網上有傳曾與姜濤傳緋聞的《YOLO》黃曦誼（Candy，前名黃曉文）、ViuTV《廣告女皇》參賽者Aggie及《造星III》30強止步的Christine（鄭嘉欣）都有出席面試。