自爆朋友為名牌手袋出賣自己險輪姦 邵音音：我唔會再信朋友

邵音音早前接受張寶華YouTube頻道的訪問，音音姐娛樂圈打滾多年，一直被視為傳奇女子，在訪問上提到過往拍攝風月片、受騙、毀容等人生經歷。屬「義氣女」的音音姐，年青時為了一位女歌手朋友出錢又出力，沒想到對方竟為了一個名牌手袋而出賣自己，音音姐說：「嗰陣我哋5個人食飯，佢哋灌醉咗我之後，帶咗我去開房，隱約間聽到有話：『真係做唔出，佢真係好無辜，我真係唔忍心！』其他嗰兩個人聽到之後，都放棄咗，嗰陣我一直係咁喊，覺得好痛心，點解個女朋友會咁樣我？」點知返到香港後，有不少娛樂雜誌報道她在當地「賣肉」：「我當時真係好痛苦，背後做呢啲事嘅人，全部都係我好信任嘅朋友。」邵音音不諱言只能怪自己容易信人：「佢有同我講對唔住，不過我而家釋懷咗，人哋都係為咗生存啫。」

邵音音亦談到第一套風月片：「嗰陣佢講得好好聽，話只係拍到背面，鏡頭係睇唔到，點知上映嘅畫面係另一回事，怪自己知識唔夠，人同人嘅交往又唔夠，經驗係攞到痛嘅教訓。」後來一脫不能回頭，為了生計再接拍了幾部風月片後，就結婚嫁人，但原來連婚姻都是一場賭博，丈夫目的同朋友打賭而娶她，「我冇愛情，我除過衫，唔會有人想同我有愛情，家底好啲都唔會娶我，點會娶一個買幾蚊Video就睇到佢全部嘅人，邊個家族會接受娶呢啲老婆？風月片嘅打擊真係好大，係我毀咗自己，但係冇諗過而家會再紅，我覺得上天對我不薄。」

邵音音形容美貌害了她的人生，當時只會想點樣可以不再行衰運，已經不會再理自己的外貌，現時是人生最開心、最舒坦的日子，她說：「我唔再信人，亦唔需要朋友，我有家人就夠。感謝我仔女原諒我，佢哋由細到大都離唔開『媽媽係肉彈邵音音』呢句說話，我好對唔住佢哋，佢哋冇得選擇父母，但佢哋喺咁多是非之中仍然選擇孝順我。」