新歌加碼拍跳舞版MV ANSONBEAN為著背心努力操肌

ANSONBEAN首支跳舞單曲《CRUSH（oh no!）》早前舉行過MV首播會，公司更不惜工本「加碼」為他拍攝dances version特別版。ANSONBEAN說：「因為首歌MV裏面有太多情節，所以公司想拍一個dances version，等大家可以睇清楚成隻舞。其實要跳成晚，唔係太辛苦，反而中間休息時間，我仲要攞條橡筋帶出嚟練肌肉，無非想畀人感覺大隻啲。」
一直努力操肌的ANSONBEAN，除了勤上健身房，更加入不同類型的運動，改善身體線條。「以前我一個星期做三日gym，依家會一星期操五六日，另外我又會去玩攀石、游水、打網球、滑浪，純粹想做多啲運動，好玩得嚟又大隻啲，想著背心嘅時候可以挺啲、橫啲。」

當日MV在晚間拍攝，有工作人員「萬歲」請食pizza，但ANSONBEAN卻不為所動，整晚只不停飲水。「我唔食嘢唔係怕肥，係驚生暗瘡影響皮膚，所以要戒甜戒煎炸食物，以前我都鍾意食炸雞，可以一次過食三件，又鍾意食芝士蛋糕，但依家掂都唔敢掂。」
工作排山倒海，廣告代言又一個接一個，問ANSONBEAN是否變相無時間追女？怕醜的他說：「係…係呀！冇時間追女仔呀，不過我啲MV全部都已經係女友視覺，所以我唔使追！」