星島獨家｜莫文蔚上半場完美落幕 誓與老公永不分離

今年是莫文蔚（Karen）在演藝圈遊走第二十八個年頭，剛過去的6月，Karen在香港紅磡體育館舉行《絕色莫文蔚世界巡迴演唱會》，以香港作巡唱的最後一站，同時亦宣布是最後一次舉行大型演唱會，更特別製作了The Visual Album（影像專輯）《The Voyage》，重新演繹5首經典的廣東歌，為自己的上半場畫上完美句號！

撰文∣Cynthia　攝影∣譚志光

紀念出道二十五周年，今年51歲的莫文蔚（Karen）在2018年舉行人生最後一次大型巡唱《絕色莫文蔚世界巡迴演唱會》（UNIONPAY Presents KAREN MOK THE ULTIMATE GRAND SLAM SHOW），走遍世界四十個城市的巡唱。最後一站，莫文蔚選擇在紅館舉行一連三晚演唱會，完成巡唱尾站。她特別製作了The Visual Album（影像專輯）《The Voyage》，以音樂紀錄片配合現場收音的形式，帶樂迷重遊《喜劇之王》其中一個重要拍攝地點——石澳健康院，Karen表示：「首先好難得隔咗咁多年之後可以返嚟香港出廣東唱片，上次出廣東碟已經是二十年前，跟住覺得除咗有幾多新歌曲之外，又想有幾隻經典歌曲係大家都會鍾意，同埋我自己好想用唔同的方式重新演繹。如果就咁行入錄音室、就咁一個唔同嘅版本好似唔夠好玩，所以就諗到呢個idea，呢個影像專輯，就可以令到大家聽歌嘅時候唔係齋聽，都要有埋個畫面，咁啱我哋又揀咗幾隻同樣來自電影嘅主題曲或者插曲，更加順理成章覺得歌曲要配合畫面，我又鍾意唱live，於是決定去返石澳，即係我哋拍《喜劇之王》取景地，喺嗰度用live Band方式重新演繹，真係好正！有幾隻歌都係我想重新演繹，例如《食神》最尾的音樂，我係唱咗一段初戀嘅歌曲，但唔係一個完整嘅版本，在電影中只不過出現半首，我覺得係時候要認真去唱呢隻歌，配合畫面去講故事。」

重遊石澳感觸良多

因為工作和外籍老公Johannes的關係，Karen經常要走遍世界各地，甚少有機會長留香港，她亦直言已經多年沒去過石澳，藉着今次製作影像專輯，終於有機會重遊舊地，Karen感觸良多，回憶道：「其實我真係好多年冇去過石澳，我諗真係二十年前拍呢套戲嘅時候，之後都冇特別落去石澳行吓，所以今次有咁嘅機會就覺得好正。咁多年來喺香港嘅時間好少，有機會返嚟香港都唔會特別去邊度散吓步、散吓心，所以今次就乘機暢遊一下！好似去sightseeing。咁多年後返到去石澳，其實本身個印象都好深刻，尤其是喜劇之王呢套電影都打動好多人，有啲場面或者場景特別iconic，特別係健康院出邊嗰個地，跟住又有棵樹，側邊又有海，呢啲畫面係入晒腦。所以拍之前我都話一定要去返嗰棵樹嗰度，諗住攞嚟做背景，但點知我哋諗住去睇景嘅時候，原來前幾年打風，個棵樹已經冧咗，好傷心！但其實去到所有嘅感覺已經返晒嚟！」

主動相約 老友敘舊

由於疫情關係，Karen去年終於有機會和老公留在歐洲，享受真正的二人世界，今年回歸香港，除了抽時間陪伴媽咪，Karen亦趁機會相約一班朋友敘舊，問她是否屬於主動聯誼的人？Karen直認不諱：「我主動㗎！我以前仲離譜，以前未有email或者WhatsApp的時候，最多係打電話，有時因為工作關係我會去唔同地方，因為以前曾讀過國際學校，認識好多唔同國家的朋友，離開學校之後大家就失散咗、各自回國唔會再特別聯絡，開始工作之後，如果有機會去其他地方，有些10年冇見的朋友，我都會無端端打去佢屋企，跟住就話『喂！我係Karen，我嚟咗你個城市！』佢哋就會癲咗，好開心！所以我係會好主動做呢啲嘢嘅人！」

經理人操刀填詞

新專輯內其中一首歌《原來...甚麼都有可能》由Karen共事十多年的經理人Joey填詞，歌曲背後亦有故事，Karen表示：「這首歌我一聽到旋律就覺得好特別，好有氣質、好high！好似有兩把聲音喺度對話。一直好想有一首歌係回應我人生中第一隻single，就係1993年出道的第一隻派台歌《原來沒可能》，當時心諗點解唱片公司會俾一個新人呢隻歌名？好似唔係幾好意頭，應該「乜都有可能」先至係㗎嘛！呢件事我一路留喺心入邊，覺得冇理由咁嘅，有一日我一定要做返一隻歌嚟同呢隻歌有回應！二十八年後，做咗好多好開心嘅成就，一路上好精彩、好好玩，嚟到呢個moment，所謂嘅上半場去到一個終點，所以成日都會同我經理人Joey講，有一日一定要整一隻歌叫《原來甚麼都有可能》，為自己爭番啖氣，咁啱又碰到黃妍俾我呢隻旋律，就覺得呢隻歌掂呀！夠有型去講一件咁嘅事，亦都覺得呢隻歌嘅歌詞一定好難寫，所以就交俾同事Joey寫啦！我覺得大家投契就得，當然佢好了解我，因為我哋真係共事咗十二、十三年！」

暫別老公陪伴媽咪

講到愛情，Karen和初戀老公Johannes相識30多年，兩公婆默契十足，演唱會期間，Johannes更專程飛回香港，在尾場上台為老婆伴奏。Karen坦言想和老公永不分離：「老公仲係香港，我哋梗係想永不分離，哈哈！嚟緊佢可能都會有自己嘅事情要返去歐洲先，但我喺香港仲有其他工作，加上舊年成年都唔喺香港，所以今次返到嚟梗係要陪下媽咪，佢好掛住我！留多一排先，其實都好難plan，因為由舊年疫情開始，知道好多嘢唔係理所當然，plan唔到！」

原文刊於《星島日報》名人雜誌（逢周日見報）