Kelly Online｜答謝球衣贊助商 伍家朗引李靜金句：波係一場一場打嘅

捲入球衣區旗政治風波並在奧運男單分組賽出局的男單球手伍家朗已從日本回港完成隔離，伍家朗今日在社交平台稱「今屆打出嚟嘅成績都係未如理想，但絕對係一次好特別嘅奧運體驗。」並向家人、教練及球衣供應商逐一致謝。他更引用乒乓球教練李靜的金句說︰「波係一場一場打嘅，飯係一啖一啖食嘅。」他預告下一個目標未必是巴黎奧運，而是做好中間的比賽同訓練。

伍家朗形容，「話咁快奧運尋日就已經閉幕咗，到而家其實都仲未反應得切等咗5年嘅東京奧運就咁就完咗。雖然今屆打出嚟嘅成績都係未如理想，但絕對係一次好特別嘅奧運體驗，而且喺整個備戰過程入面，我同我身邊幫助過我嘅人絕對係付出咗200%嘅努力」。伍家朗又感謝「我嘅家人同女朋友由始至終都咁支持我打波嘅事業，等我無後顧之憂咁去搏殺」。

雖然發生球衣風波帶來不愉快經歷，他仍然感謝「羽總喺我由細到大不論比賽贏輸都會鼓勵我，一直俾機會我刷新自己最好嘅成績」；「多謝Panasonic頒發獎學金資助我買裝備備戰奧運，多謝Lululemon同Fila喺出發前仗義相助送出我比賽嘅衫褲」。他特別提到，「多謝前贊助商Yonex，儘管而家我哋並無合作關係，但係喺賽區仍然願意喺有限嘅資源同時間之下幫我趕印區旗，令我可以盡快收拾心情比賽」。

他並感謝「一直幫我備戰，努力提升我技戰術嘅教練們: 陳仁傑教練，杜鵬宇教練，劉志恒教練」，還有「我嘅隊友，尤其是男單組嘅隊友，無你哋我根本無得訓練，你哋犧牲咗你哋嘅訓練時間令我可以練得更加多」;「一眾朋友們，你哋沿路陪我笑陪我喊，我開心時聽我分享，我唔開心時又幫我減壓」。

他亦不忘感謝「奧委會喺奧運期間一直做我哋嘅back up，等我哋運動員煩少好多比賽外嘅瑣碎事」;「體院，體院各部門對我嘅支援真係功不可沒，體能教練、治療師、營養師、心理導師、科研部全部都盡最大嘅努力去幫助我創高峰」

他最後感謝支持者，「如果無支持者撐我，我都未必捱到職業生涯嘅哩一日。因為有你哋，我遇到低谷時更加有決心要起返身，我最想令大家替我開心，而唔係替我唔抵」。

他形容，「東京奧運會已經成為過去，亦都需要向前看。我下一個目標未必就係巴黎奧運會，因為正如李靜教練所講: 『波係一場一場打嘅，飯係一啖一啖食嘅。』所以我必須要做好中間所有比賽同訓練，先可以再將目標擺喺下一屆奧運會。」