Gin Lee與偶像合唱終圓夢 張學友坦承有放棄念頭

Gin Lee李幸倪早前推出新歌《日出時讓街燈安睡》邀請到歌神張學友featuring，能夠與偶像合作，對Gin Lee來說是一次圓夢的機會，亦是歌手生涯中的里程碑。是次合作其實得到負責作曲及監製的Eric Kwok穿針引線才成事，他們亦在訪問中大談今次合作的經過及當中的趣事。

能夠邀請到歌神張學友合作是非常難得的機會，而歌神亦解釋了當中的難度，他說：「第一，我從來都冇離開過環球，所以唔係環球嘅歌手咪好難囉；第二，以往我經常舉行巡迴演唱會，每次都至少一、兩年時間在外地演出，但係而家因為疫情嘅關係，我就冇喺內地搵食，所以咪成日都喺香港；第三，我覺得這首歌動聽，林若寧嘅詞填得很好，原本我同Eric講不如畀我唱，點知佢話呢首歌畀咗Gin唱，所以咪有一起唱呢個想法。第四，Gin本身是個很好嘅歌手。」克服了以上四個難關，所以促成了今次Gin與學友的合作。

今次《日出時讓街燈安睡》以一個奮鬥了一生但還未達到心中成就的人作故事藍本，雖然還未取得成功，但他選擇休息一會才發現自己錯過了身旁美好的事物，Gin說：「我覺得呢首歌適合唔同年齡嘅人，因為到咗唔同人生階段都會想停一停，審視自己正在走嘅路。」Eric亦覺得只要生活在大城市，面對各種競爭而沒有時間享受人生的人都會有共鳴。而學友覺得，人在不同階段都有想放棄的心，但這念頭卻能化為堅持下去的動力，他說：「我覺得呢首歌寫得很好嘅地方係，一個放棄嘅念頭出現咗，每人都有唔同嘅選擇，我亦曾經諗過係咪要放棄，但回頭諗諗，我仲可以做啲嘢呢？喺唔同階段都會有機會出現放棄念頭，但係可以畀你檢視自己，先會選擇堅持。」