胡楓自嘆入行多波折 曾因「漏口」險失面試機會

為慶祝資料館成立20周年，新城電台找來由家燕姐及思敏主持《光影夢工場》，邀請到胡楓（修哥）及麥秋成當嘉賓，大談歌舞片入行的經歷兼分享難忘事。入行70年的修哥素來有「舞王修」之稱，參演超過300套電影，2003年得到香港電影金紫荊獎的終身成就獎，早前亦成為踏足紅館的最年長歌手，成績輝煌。回想起入行經過，修哥坦言幾乎失敗︰「當年睇報紙見到廣告有招考男女主角，所以寄相去試做演員，點知冇回覆，原來寄失咗，所以我收唔到。第二次再寄信約我去見面，見面期間電影公司老闆問我係咪「漏口」，仲話「漏口」唔可以做主角，只可以做西瓜刨。」修哥反駁指拍攝時就不會「漏口」，老闆對於從未拍過電影的修哥半信半疑，但都依然給修哥一個面試的機會，殊不知面試時，修哥就變了另一個人，他笑說︰「我係1號，同2號參加者一齊試鏡，點知2號Out咗，我就留低同3號繼續試，如是者我由第一個試到最尾，最後仲傾合約。屋企人當時反對，覺得拍電影係貪威識食，仲覺得無理由輪到我。」結果，修哥第一套參與的電影就當了男主角。

本身是排舞老師的麥秋成，19歲讀大學時才學跳舞，放學就帶同錄音機去空地狂練。19歲才學跳舞比其他人遲起步不緊要，最重要是機會來到時要好好把握︰「我畢業後做Dancer，當時無錢買機票，咁啱有個美國出trip表演嘅機會，表演後自己留低繼續學跳舞。期後，第一套有份排舞嘅電影就係由陳偉霆、G.E.M.、小肥等當年新人有份演出嘅《愛出貓》。之後到電影《狂舞派》，當中有個傷殘人士但跳舞好叻嘅角色，我即時諗起當年喺美國上堂時認識，喺星光大道跳Break dance嘅人，所以邀請咗佢嚟參演其中一角。」

修哥與麥秋成參與過很多歌舞電影，而修哥有份參與的歌舞電影更超過100套，一日拍4、5組，但他覺得最辛苦不是記舞步，而是很熱︰「當年嘅歌舞片以跳舞為主，無乜劇情，所以唔太需要預先排好，即場練幾下就拍得。最辛苦係要著西裝兼打呔，現場又無冷氣，加埋強勁嘅燈光，唔駛跳都已經成身汗。」當年的歌舞片以跳舞為主，舞蹈則以扭腰舞、CHA CHA等居多，相比近年的歌舞電影，舞蹈上靜態得多。而近年的歌舞電影，會有很多的情節及故事內容，配上不同的拍攝手法，可以讓觀眾有另一番享受。