星島獨家｜前輩身上找回迷失的自己 呂爵安：我唔係世界仔

呂爵安（Edan）憑早前在劇中演田一雄一角而人氣爆燈。原來Edan演出該劇時曾感覺十分迷惘，幸好最近轉戰影壇參演賀歲片《闔家辣》，從一班前輩身上學懂自我調節，重整心情投入工作。今年的工作成績亮麗，但Edan不擔心搶去其他男團成員風頭。他說：「彼此間係一個良性競爭，競爭的心態點都會有少少。」

　　呂爵安（Edan）在今年上半年的成績，可謂走勢凌厲。首先於年初推出單曲《E先生連環不幸事件》成為組合中第6位成員單飛，首日推出在視頻平台取得超過20萬點擊率。

　　在人氣劇《大叔的愛》飾演「田一雄」的Edan，夥拍組員盧瀚霆（Anson Lo）及黃德斌演繹一段爆笑的「斷背情」，引發一輪追劇潮，雖然該劇圓滿結束，但粉絲在網上洗版大呻不捨。

　　影后級人馬吳君如亦睇中Edan的演藝細胞，更邀請他參演賀歲片《闔家辣》與一眾前輩梁詠琪（Gigi）、鄭中基等合作，亦首次踏足影壇。上半年經已工作不斷，Edan坦言很多工作範疇也接觸到，每個機會都很好，令他很感恩，更笑謂自己真係好好運氣。

　　他說：「由一月推出單曲《E先生連環不幸事件》，反應幾好！之後《大叔的愛》播映亦都ok，然後拍電影《闔家辣》，覺得突然間《E先生連環不幸事件》開始後變成E先生幸運事件，好開心有咁嘅工作機會，同時今年壓力多咗，實在太忙，不斷keep住無停過，加上愈來愈多人關注我哋，亦都好多人批評，所以想更加捉緊自己將來的作品要更加好，自不然畀到壓力自己，𠵱家學緊平衡。」

與女神玩配音

　　早前Edan更連配音都撈理，為動畫《反轉方舟動物團》聲演貪玩的長鼻獸菲尼，拍檔有女神陳欣妍(Shirley)為黑面狐莉亞配音。

　　初嘗配音滋味的Edan，坦言好新鮮又有趣，反而拍電視劇或電影配音不會似動畫電影需要扮一種特別的聲綫，亦要做不同反應的叫聲，事前大會讓他觀看原裝英文版本，還跟Shirley擺烏龍，誤以為聲演對方的角色。他說：「睇個動物角色初時唔知係男定女，錄音前一日再睇睇，原來唔係點解錯㗎？不過花姐同我講話有人搵我為動畫配音時，我話：『你真係聽到佢話要搵Edan？』因為我出名懶音勁、咬字差，仲要配音喎！所以都幾大挑戰同擔心，既然要做，但驚做得唔好，好彩有資深配音員及監製周恩恩教導。」

　　雖然跟女神Shirley拍檔為動畫聲演，但Edan笑言兩人沒有同場，大嘆很可惜，但之前在節目《辣火頭》見過面。他說：「對她印象好深刻，因為多位女仔當中她真係識煮嘢食，點解好深刻係她煮西芹布甸，大廚都讚她好有創意，但我覺得幾難食！哈哈！所以覺得她不但止有外表，仲好賢淑的感覺。」

銀行返工悶到嘔

　　Edan笑言演藝工作的是他人生第一份工，雖然曾經在銀行做實習生，但感覺悶到抽筋，現在工作很忙碌，不過沒有一點不想返工的感覺，反而很期待每一日的工作，幸好獲得家人支持。他說：「有時返到屋企攰到真係唔想講嘢，媽咪都會煲湯同照顧我，朋友亦很支持，希望一路做落去。參與綜藝節目覺得最少壓力，因為做返自己去玩，不需要諗太多，唱歌、演戲不是自己強項，叻過我的人好多，我梗係想唱好啲、做好啲！但拍完《大叔的愛》，我幾迷惘，唔知點為之好或唔好？當接拍《闔家辣》後，知道同咁多前輩合作拍電影更加驚，在他們身上學到好多，他們有時會教我咁樣講對白會更加好，令我更加知道點樣調節返個人物性格，今次經歷真的好感激。」

對於《大叔的愛》獲好評，Edan直言預期該劇的題材必定會引發大家討論，起初也擔心會跟日本版本比較，都知道自己不及別人做得好，但可能廣東話演繹會令觀眾更加親切。

　　談到近年工作成績亮麗，可會擔心搶去其他成員風頭？他 說：「不會！係一個良性的競爭，競爭的心態點都會有少少。

「老公專頁」見到愛

　　自男團出道以來人氣大旺，不論甚麼年紀、階層的女生們，也被他們迷倒變成「鏡粉」一族，更引發「鏡粉」老公在社交網開設專頁讓一眾老公借機大吐苦水。Edan笑言跟組員睇過後也覺得貼文內容好好笑，他認為該專業群組其實只是畀機會老公晒命幾愛老婆。他說：「如果真係介意就唔會post出來，心入面接受咗，覺得幾有趣才會甫出來分享，我覺得這個群組幾有愛的表現。」

不會擦鞋奉承人

　　此外，在早前一個真人騷節目中，除了讓一眾成員透過在梅窩十多天的相處時間重新認識各隊員外，更解開出道以來的心結，從而解讀十二子的個性。花姐大爆當初挑選Edan加入男團是陪襯，並非主力要捧紅的隊員，亦有粉絲經過節目解讀後， 有人認為他是典型世界仔，一定會最襟撈、最多機會。

　　Edan說：「好多人對陪襯這句說話睇得好重，覺得點解咁話我？但對我來講好輕，完全無傷害性，在這個情形下事實的確真！我覺得作為artist要認清事實，要有自知之明，唔知的話，會唔知點行落去。當時我得21歲，覺得慢慢試得就得，唔得咪唔得囉！坦白講的確有運氣成份，但都要盡力做，保持提升自己，就有人留意到。我在網上都睇到有人話Edan係世界仔，我對世界仔的定義係好鍾意擦鞋，其實係貶義詞，但覺得自己完全唔係，我知分寸，但從來不會擦鞋去奉承別人，只要做好自己就夠。」

撰文∣鄺芷瑩　攝影∣鄧國良

原文刊於《星島日報》名人雜誌（逢周日見報）