【獨家】跟蔡頌思陳雅麗推生酮月餅唐貝詩經常忟憎為份量拗餐死

2021-08-19 00:30

唐貝詩（Lydia）、「40億千金」蔡頌思（Jocelyn）及陳雅麗（Allie）3位好姊妹成立自家生酮系列甜品於網店出售，繼曲奇後再推出生酮月餅。3位老闆希望將健康食品share畀所有關注健康嘅藝人，Allie最想送畀為食姜濤，因為就算佢狂食都唔怕變返做肥仔。採訪：方騫平攝影：譚壹致場地：Paragon Studio

去年中秋節前夕，三位老闆曾學做低糖月餅送暖，之後靈機一觸變成商機。「財政大臣」陳雅麗話今次月餅項目由成本至包裝都好貴，共投資6位數，總之將以往賺到嘅掟晒落去，單係造餅配方都研究咗5個月。

食足100個月餅
「大廚」蔡頌思坦承曾經好氣餒：「最初面對朋友負評都唔好受，佢哋話『我哋唔會畀錢買』、『椰撻嚟㗎？餅店買10幾蚊個咋喎！』由於太揼本唔會有退路，我哋不停食不停再試，至少食咗100個，最後都做出成果。」陳雅麗從造餅過程啟發人生，就算遇上挫折都要勇於面對。唐貝詩亦曾有忟憎時間，單係每個月餅嘅份量都拗餐死，好彩係3人組合，投票就解決到問題。Jocelyn最想送月餅畀當年搵佢做舞台劇嘅恩師張達明；Lydia就想送畀Sammi，因為見佢喺網上食嘢好吸引，而Allie就答：「𠵱家個個都想送禮畀MIRROR，但唔知佢哋肯唔肯收我哋嘅心意，其實我哋好欣賞姜濤，佢為咗Keep fit成日要節食，只可惜我哋未夠錢搵佢做代言。」