自爆經常離家出走 孫慧雪：做咗媽媽唔可以咁衝動

關心妍、孫慧雪及張美妮最近在最新一集《靚媽圍爐》中大爆老公常犯的錯，原來張美妮及孫慧雪婚前經常與另一半嘈交後離家出走。孫慧雪坦言與老公也是火爆之人，之前試過是一句不合即離家出走的人，雪雪記得生 bb後有一次因小事吵架，她習慣性嬲爆爆離家，落到樓下醒覺自己已是媽媽，不能再衝動：「嗰一刻我諗，死啦，兩個鐘後我又谷奶、又要餵bb， 走都要上返去執嘢，但係帶埋bb走，剩係bb用具已經多到冇可能搬到，終於我打畀老公，叫佢落樓氹番我！跟住佢死死地氣走落嚟，問我想點，我咪唯有死死地氣話你攬返我！攬完我就上返去！哈哈。」

張美妮笑稱自己是staycation始祖，因為婚前與老公同居，所以一吵架就無處可逃，唯有住酒店休息一下等大家冷靜，不過現在有個女，離家出走這首歌已經不能唱，因為捨不得丟下女兒。關心妍反而表示自己未試過離家出走：「啲人話男人月經前緊張，係情緒易波動，凡事緊張，易疲倦，易肚餓，又要食甜嘢。我老公都幾乎中晒。之前佢太緊張，我會爆佢，不過依家試得多，會慢慢知道要調解、要叫佢冷靜。我始終覺得，老公係陪你走一生一世嘅人，仔女大個咗會有佢哋嘅人生，所以唔可以因為生咗仔女就冷落老公，奉勸大家，要記得兩公婆一定要有返二人世界時間，夫妻關係好，仔女都會學識愛。」

講到老公婚後不浪漫，三人就異口同聲表示的確係會變懶，婚後愈來愈「是是但但」，關心妍話試過一次，老公訂了一個價錢非常非常非常昴貴、體形非常非常大的專業化妝箱給她，她打開後簡直想暈，聽到價錢之後更爆炸，「我嗰一刻真係忍唔到係咁鬧佢，因為個箱大到我係拎唔到，連我個化妝師都唔會用，使咁多錢買咁大嚿嘢畀我做咩？我平日出街都係帶個袋仔！佢之後學識咗啦，仲識得喺一個可以退款嘅網上購物平台揀五件禮物畀我，唔要個啲佢去退番錢。」