【獨家】同老婆拍拖買家品　「超薄」陸永出錢出力做「咕喱」

以組合農夫出道的陸永，曾自爆入行初期戶口得雙位數，幸與鄭裕玲（Do姐）拍攝TVB節目《 Do姐有問題》及《Do姐去Shopping》等，憑搞笑作風及口才成功入屋，近期於黃金時段兩線劇《智能愛人》和《七公主》演出外，更升呢男一！雖然劇中艷福無邊，但他私下是一名「愛妻號」。日前忙完宣傳，他便陪太太Reina出沙田買家品，其間唔只出錢，個身薄到好似「紙片人」的陸永仲出盡力做「咕喱」，幫老婆拎重嘢。採訪：譚壹致

早前晚上近9點，《頭條日報》記者於沙田IKEA撞到陸永夫婦，穿黃Tee襯貼身淺牛的「陸太」Reina，挽住個價值12,100港元的LV手袋仔，輕輕鬆鬆睇家品，最終揀了一袋戰利品，包括一個垃圾桶、兩個咕𠱸、密實袋及蠟燭等，全部一律由老公孭起。雖然出名瘦到成張紙咁薄，但勝在夠高挑，官方身高183cm的陸永都唔算太狼狽，他側埋一邊高低膊，以單肩托住個大袋，辛辛苦苦終於行到收銀處。

對老婆照顧周到
兩公婆有默契地分工合作，陸永逐件貨品拎上枱畀職員「嘟」，Reina就負責將已「嘟」的東西放進環保袋，見她塞兩個咕𠱸入去都有困難，陸永即幫手裝埋剩餘的物品落袋，之後拎埋張信用卡出嚟找數，再順手孭番個大袋離開。隨後，陸永獨自落2樓Coffee shop買咖啡；攞完杯嘢飲，他呆呆吓行出舖頭，然後搭扶手電梯落地下會合老婆，一齊排隊蓋完車飛就攞車走人。