Juicy叮｜兩地盤漢巴士坐低 女乘客大叫「好臭」噴消毒劑兼起身打手勢

有網民在討論區「親子王國」發文，目睹兩地盤男工人在巴士上坐低後傳汗臭，旁邊女乘客立即使用消毒劑，離座時更展出不屑惡臭手勢，被批無品。

女網民透露，近日坐巴士途中遇上兩名男子上車坐在她前面，頓時傳出汗臭味，明顯是地盤工人放工，不過因為車廂冷氣強勁，女網民只是坐短途車所以無調位。不過另一行的女乘客則好大動作，「即刻攞支消毒噴霧噴咗幾下，我反而俾佢支嘢沌到，過一陣，其中一個女人都幾大聲：『上去啦，好臭呀！』」

女網民形容，當時兩位地盤工都一定聽到，然後兩名女乘客於是起身上巴士上層，還故意用手「撥下撥下一路話臭，似做畀人地睇咁」，女網民批評「兩個女人真冇品」。女網民坦言，「其實如果係長途，我都會調位，不過個心會唔好意思，同埋會靜雞雞調」

有網民留言批評，「直頭無品，人地出汗有味好正常，大家都係畀咗車費，冇理由叫人走開」、「其實如果我遇到……我會鬧，我會鬧果兩個女人」、「我直頭會出聲鬧兩個女人，知唔知人哋做地盤好辛苦，點臭都唔夠你兩個把口臭」

也有人感同身受，「我試過同一部lift，帶住口罩都非常難頂。但我唔會做任何嘢令佢唔舒服咯，最多自己閉氣咋。人地大熱天時體力勞動都好辛苦」。

也有人表示理解，「係密閉空間，又係好難頂… 我明… 就好似公司有女同事噴咗香水一樣… 唔係人人受到…」、「試過臭得非常嚴重，我直程落車等下班，因為真的怕會嘔」、「我反而試過個情況係坐上層，有兩個應該係着水鞋嘅男人坐第二行，巴士途中可能想吹下隻腳除咗水鞋，嗰啲臭味一路隨着巴士向前行氣流沖去車尾，臭腳味真係好難頂，我忍唔住大聲嗌唔該可唔可以着返對鞋因為後邊真係聞到好臭，佢哋先至施施然着返對鞋！」

帖文轉載自「坐巴士上左兩個好臭既男人，你會」