男團P1X3L推新歌《Oh My God》 曾被叫「躝返屋企」道盡辛酸

跳唱組合P1X3L 喺《七救星》入面上天台跳唱一幕打動人心，連ViuTV台長魯庭暉都有留意叫大家支持。PIX3L呢隊組合名相當難記，被「點化」應該簡單直接啲叫「Oh My God」，而佢哋亦順應民意，正所謂打鐵要趁熱，近日推出新歌《Oh My God》，搵嚟作曲人歐國城，但作詞及主唱都係「OMG」，歌詞都是他們的心聲，當中一句「個個都叫我躝返屋企」，但遇上挫折是否應該繼續前行？道盡三子入行後辛酸苦樂！

三位成員亦有在社交網上發文，George留言：「呢首歌充滿住不甘。但只要堅持總會有發光發亮的一天，《大海男兒》教識我哋三個『逆境自強』」；Phoebus則引用當中一句歌詞「依家先至啱啱開始」，強調未來會繼續努力；而年紀最細、只得20歲的Marco雖然被批評得最多，但就充滿正能量：「話咁快就出咗道差唔多成年，睇返我自己由造星一路走到而家，可以講係一波三折。呢條路充滿住汗水同埋淚水，充滿住挑戰。不過，我好享受。亦都好幸運。」他慶幸有隊友一齊行，希望大家可以見證佢哋嘅成長。ERROR嘅肥仔亦有留言撐師弟：「其實佢哋都好努力。」繼續互相扶持。